धनगढी ।सरकारी कार्यालयको सूचना तथा सन्देश सरकारी सञ्चारमाध्यममा मात्र प्रकाशन/प्रसारण गर्ने नेपाल सरकारको निर्णयको विरोधमा नेपाल पत्रकार महासंघ कैलाली शाखाले आइतबार प्रमुख जिल्ला अधिकारी हिरालाल रेग्मीमार्फत प्रधानमन्त्रीलाई ज्ञापनपत्र बुझाएको छ।
सरकारको उक्त निर्णय अभिव्यक्ति स्वतन्त्रता, प्रेस स्वतन्त्रता र निजी मिडियाको अस्तित्वमाथि नै प्रहार भएको भन्दै महासंघ केन्द्रीय समितिले थालेको दबाबमूलक आन्दोलनकै क्रममा कैलाली शाखाले ज्ञापनपत्र बुझाएको हो।
ज्ञापनपत्र बाचन गर्दै नेपाल पत्रकार महासंघ कैलालीका सचिव तेजराज भट्टले सरकारी विज्ञापनमा एकलौटी गर्ने निर्णयले देशभरका हजारौं पत्रकार र निजी मिडियाको रोजीरोटी खोसिने बताए । उनले निर्णय तत्काल फिर्ता नभए आन्दोलनलाई थप कडा बनाइने चेतावनी दिए।
महासंघ कैलालीले आन्दोलनको दोस्रो चरणअन्तर्गत जेठ २७ र २८ गते जिल्ला प्रशासन कार्यालय अगाडि धर्ना दिने कार्यक्रम रहेको सचिव भट्टले जानकारी दिए ।
