धनगढी । सरकारको विज्ञापनसम्बन्धी विभेदकारी नीति विरुद्ध नेपाल पत्रकार महासंघ कैलाली शाखाले पनि जिल्ला प्रशासन कार्यालय अगाडि धर्ना दिएको छ ।
पत्रकार महासंघ केन्द्रीय समितिले घोषणा गरेको कार्यक्रमअनुसार कैलाली शाखाले पनि आज प्रशासन कार्यालय अगाडि धर्ना दिएको हो ।
सूचना तथा विज्ञापनसम्बन्धी विभेदकारी र स्वेच्छाचारी निर्णय खारेज गर,जिम्मेवार पत्रकारिता हामी गर्छौँ, प्रेस स्वतन्त्रताको लागि अझै लड्छौँ लेखिएको व्यानरसहित धर्ना गरिएको थियो ।
धर्ना कार्यक्रममा बोल्दै नेपाल पत्रकार महासंघका केन्द्रीय सदस्य योगेन्द्र बलायरले सरकारले ल्याएको सरकारी मिडियालाई मात्रै सरकारी विज्ञापन दिने नीति खारेजी हुनुपर्ने बताए ।
उनले राज्य सबैको अभिभावक भएको बताउँदै राज्यले अभिभावकीय भूमिका निभाउनु पर्ने बताए । निजी क्षेत्रका मिडिया बन्द गर्ने उदेश्यले सरकारले ल्याएको विज्ञापन नीति तत्काल खारेज गर्नुपर्ने उनको भनाइ थियो ।
नेपाल पत्रकार महासंघका सुदूरपश्चिम प्रदेश अध्यक्ष भरत शाहले अहिलेको सरकारले निजी मिडियालाई आर्थिक घेराबन्दी गर्ने नीति ल्याएको बताउँदै सरकारले जुनसुकै हालतमा पनि फिर्ता लिनुपर्ने बताए ।
उनले संविधानमै उल्लेखित पूर्ण प्रेस स्वतन्त्रताको हकको ग्यारेन्टी गरिनुपर्ने बताए । उनले माग पूरा नभएसम्म आन्दोलन नरोकिने बताए ।
नेपाल पत्रकार महासंघ कैलालीका अध्यक्ष श्रवण देउवाले सरकारले ल्याएको विभेदकारी विज्ञापन नीति तत्काल सच्याउनु पर्ने बताए ।
