धनगढी । कैलालीको चुरे गाउँपालिकाको न्यायिक समितिले विभिन्न स्थानीय तहका न्यायिक समितिहरूसँग अनुभव आदानप्रदान तथा अनुगमन भ्रमण सम्पन्न गरेको छ।
चुरे गाउँपालिकाकी उपाध्यक्ष तथा न्यायिक समिति संयोजक धना थापाको नेतृत्वमा सम्पन्न भ्रमणमा न्यायिक समितिका सदस्य तथा चुरे गाउँपालिका–३ का वडा अध्यक्ष खगेन्द्र खडायत लगायत कर्मचारीहरूको सहभागिता रहेको थियो।
भ्रमणका क्रममा टोलीले बुढीगंगा गाउँपालिका (कोशी प्रदेश), मायादेवी गाउँपालिका (रूपन्देही) तथा गुल्मीदरबार गाउँपालिका (गुल्मी) लगायतका स्थानीय तहको अवलोकन गरेको थियो। सो अवसरमा सम्बन्धित पालिकाका न्यायिक समितिहरूसँग स्थानीय स्तरमा दर्ता हुने तथा समाधान गरिने विभिन्न प्रकृतिका मुद्दा, न्याय सम्पादन प्रक्रिया, चुनौती र अभ्यासबारे विस्तृत छलफल गरिएको थियो।
साथै, न्यायिक समितिहरूबीच अनुभव आदानप्रदान गर्दै प्रभावकारी न्याय सम्पादनका उपायबारे समेत विचार–विमर्श गरिएको चुरे गाउँपालिकाले जनाएको छ।
अनुगमनका क्रममा भ्रमण टोलीलाई सम्बन्धित पालिकाहरूले भव्य स्वागत गर्नुका साथै मायाको चिनो प्रदान गरेका थिए। चुरे गाउँपालिका न्यायिक समितिले भ्रमण सफल बनाउन सहयोग गर्ने बुढीगंगा गाउँपालिका, मायादेवी गाउँपालिका र गुल्मीदरबार गाउँपालिकाका जनप्रतिनिधि, प्रमुख प्रशासकीय अधिकृत, न्यायिक समिति सदस्य, वडा अध्यक्ष तथा कर्मचारीहरूप्रति धन्यवाद व्यक्त गरेको छ।
न्यायिक समितिले आगामी दिनमा पनि यस्ता अनुभव आदानप्रदान तथा सहकार्यका कार्यक्रमलाई निरन्तरता दिने जनाएको छ।