धनगढी– प्रधानमन्त्री शेरबहादुर देउवाले आगामी मंसिर ४ गते हुने प्रदेश तथा प्रतिनिधि सभाको निर्वाचन संविधान बचाउने र मास्नेबीचको लडाइँ भएको बताएका छन् । कैलालीको धनगढीमा आइतबार आयोजित प्रशिक्षण तथा कार्यकर्ता भेलालाई सम्बोधनका क्रममा उनले यस्तो बताएका हु्न।
उनले यही कुरा सबै दलका कार्यकर्तालाई प्रष्ट पार्न सत्तारुढ गठबन्धनले देशका सबै प्रदेशमा कार्यकर्ता भेला र प्रशिक्षण राखिएको बताए । उनले नेपाल अत्यन्तै महत्वपूर्ण मोडमा उभिएको बताउँदै देश र संविधान कता जाने भन्ने भएको निर्णय मंसिर ४ मा हुने बताए।
‘संघीय शासन प्रणाली बचाउन सुदूरपश्चिमको एकता आवश्यकता छ। अहिले संविधान बचाउने र सक्नेबीच लडाइँ छ’, उनले भने, ‘अहिले संविधान सक्न र सत्ता गठबन्धनविरुद्ध राष्ट्रिय अन्तराष्ट्रिय शक्ति लागेका छन्। सुदूरपश्चिमका दाजुभाइहरुको सहयोगले गठबन्धनलाई पूर्ण रुपमा अघि बढाउँदै भोलिको राजनीतिमा गठबन्धनकै सरकार बन्ने र वर्चश्व कायम हुनेछ’ उनले भने ।
देउवाले गठबन्धनका कारण धेरैले टिकट नपाएको बताउँदै कार्यकर्तालाई फकाउने प्रयास गरे। ’धेरैले टिकट पाएका छैनन्, अन्याय भएको छ’, उनले भने, ‘गठबन्धन भएकाले कांग्रेसले सबै पद पाउँदैन नि! सुदूरपश्चिमबाटै गठबन्धनको विजय पक्का हुनुपर्छ।’
उनले मंसिरको चुनाव जिते देशदेखि विदेशसम्म नियुक्ति पाउने पनि आश्वास दिए। ‘हामीले जिते मात्रै धेरै ठाउँ प्राप्त हुन्छन्’, उनले भने, ’राष्ट्रिय अन्तराष्ट्रिय ठाउँमा अवसरदेखि नियुक्तिहरु पाइन्छ, त्यसैलेग गठबन्धनलाई जिताऊँ।’
