बझाङ । प्रगतिशील युवा समाज र दलित सहयोग समाजले बझाङका केदारस्युँ गाउँपालिका र जयपृथ्वी नगरपालिकामा सञ्चालन गरेका कार्यक्रमको सामाजिक परीक्षण गरेको छ ।
वल्र्ड भिजनसँगको साझेदारीमा सञ्चालित ‘एकीकृत विकासका लागि हातेमालो’ परियोजनाअन्तर्गत सामाजिक परीक्षण गरिएको हो । परियोजनाअन्तर्गत भएका कार्यक्रमको संयुक्त अनुगमन तथा पालिकास्तरीय परियोजना सल्लाहकार समिति बैठक सम्पन्न गरेपछि जिल्ला तहका सरोकारवालाको सहभागितामा सामाजिक परीक्षण गरिएको हो ।
सामाजिक परीक्षण कार्यक्रममा प्रगतिशील युवा समाजका म्यानेजर यज्ञराज जोशी र दलित सहयोग समाजका रमेश मालिकले संस्थाले सञ्चालन गरेका कार्यक्रम तथा त्यसबाट प्राप्त उपलब्धिबारे सरोकारवालासमक्ष प्रस्तुतीकरण गरेका थिए । कार्यक्रममा सहभागीले दिएका सुझाव तथा प्रतिक्रियामाथि संस्थाका तर्फबाट सामूहिक जवाफसमेत दिइएको थियो ।
कार्यक्रमका प्रमुख अतिथि जयपृथ्वी नगरपालिकाका नगरप्रमुख चेतराज बजालले सामाजिक परीक्षणले सुशासन र जवाफदेहिता अभिवृद्धि गर्न सहयोग पुग्ने बताए । उनले स्थानीय सरकारसँग सहकार्य र समन्वय गर्दै संस्थाले सञ्चालन गरेका कार्यक्रम प्रभावकारी रहेको उल्लेख गर्दै आगामी दिनमा पनि यस्ता कार्यक्रमलाई निरन्तरता दिनुपर्नेमा जोड दिए ।
प्रगतिशील युवा समाज र दलित सहयोग समाजले विगत केही वर्षदेखि केदारस्युँ गाउँपालिका र जयपृथ्वी नगरपालिकामा ‘एकीकृत विकासका लागि हातेमालो’ परियोजनाअन्तर्गत शिक्षा, स्वास्थ्य, कृषि, पोषण तथा भौतिक निर्माणलगायतका क्षेत्रमा विभिन्न कार्यक्रम सञ्चालन गर्दै आएका छन् ।
सामाजिक परीक्षणको सहजीकरण पत्रकार सत्यराज सिंहले गरेका थिए । कार्यक्रममा केदारस्युँ गाउँपालिका र जयपृथ्वी नगरपालिकाका जनप्रतिनिधि, विषयगत शाखाका कर्मचारी, लाभग्राही, सरोकारवाला तथा सञ्चारकर्मीको सहभागिता रहेको थियो ।
