धनगढी । वर्षायाममा डुबान र सडकमा पानी जम्ने समस्याबाट प्रभावित हुँदै आएको धनगढीको मुख्य बजारसहितका क्षेत्रमा पछिल्लो समय सुधार देखिन थालेको छ ।
धनगढी उपमहानगरपालिकाले सडक स्तरीकरण, ढल व्यवस्थापन तथा पानीको सहज निकासलाई प्राथमिकतामा राखेर काम अघि बढाएपछि मुख्य बजारसहितका विभिन्न क्षेत्रमा हुने डुबानको समस्यामा सुधार भएको हो ।
यसअघि एलएन चोक, क्याम्पस चोक, पार्कमोड, अस्पताल लाइन, हसनपुर, सहिदगेट–क्याम्पस रोड, शिवनगर र विशालनगरलगायतका क्षेत्रमा सामान्य वर्षा हुँदा पनि पानी जम्ने गरेको थियो । सडकमा पानी जम्दा पैदल यात्रु तथा सवारीसाधनको आवागमनमा समेत समस्या हुने गरेको थियो ।
धनगढी उपमहानगरपालिका–२ का वडाध्यक्ष धर्मराज ओझाका अनुसार सडक स्तरीकरणसँगै उचित ढल व्यवस्थापन गरिएपछि डुबानको समस्या धेरै हदसम्म कम भएको छ । उनका अनुसार उपमहानगरपालिकाले सडक स्तरीकरण, ढल तथा पेटी निर्माण र कच्ची सडक सुधारका योजनालाई प्राथमिकतामा राखेको छ ।
विशेषगरी मुख्य बजार क्षेत्रका सडक स्तरीकरण र पानी निकासको व्यवस्था गरिएपछि वर्षायाममा पानी जम्ने समस्या घटेको उपमहानगरपालिकाले निशाना न्युजलाई जानकारी दिएको छ ।
सहिदगेट–क्याम्पस रोडअन्तर्गत शिवनगर चोक, चकमेली चोक र राष्ट्र बैंक चोकलगायतका क्षेत्रमा विगतमा वर्षा हुँदा सडक जलमग्न हुने गरेको स्थानीय अमरराज जेठाराले बताए । सडक स्तरोन्नतिसँगै पानीको उचित निकासको व्यवस्था भएपछि अहिले आवागमन सहज भएको उनले बताए ।
उपमहानगरपालिकाले डुबानको समस्या न्यूनीकरण गर्न सडक स्तरीकरण, ढल व्यवस्थापन, सडक सुधार तथा अन्य पूर्वाधार निर्माणका कामलाई तीव्रता दिएको जनाएको छ ।
तर उपमहानगरपालिकाका केही भित्री क्षेत्रमा भने वर्षायाममा पानी जम्ने र जलमग्न हुने समस्या अझै कायमै छ । ती क्षेत्रमा सडक तथा ढल व्यवस्थापन गरी पानीको सहज निकासका लागि आवश्यक काम अघि बढाइरहेको उपमहानगरपालिकाले जनाएको छ ।
यता, पानी जमेर जलमग्न भएका क्षेत्रमा धनगढी नगर प्रहरी आवश्यक सामग्रीसहित परिचालित भई पानी निकास गर्ने गरेको नगर प्रहरी बलले जनाएको छ ।
सडक स्तरीकरण र ढल व्यवस्थापनका कामले वर्षायाममा आवागमनमा समस्या भोग्दै आएका स्थानीयवासीलाई राहत पुगेको छ । पूर्वाधार सुधारका कामले डुबानको समस्या थप न्यूनीकरण हुने र वर्षायाममा नियमित आवागमन सहज हुने अपेक्षा गरिएको छ ।
