धनगढी । नेपाल उद्योग वाणिज्य महासंघ सुदूरपश्चिम प्रदेशले नेपालको अति कम विकसित राष्ट्र (LDC) बाट विकासशील राष्ट्रमा हुने स्तरोन्नति र यसले निजी क्षेत्रमा पार्ने प्रभावका विषयमा विभिन्न अन्तरक्रिया कार्यक्रमहरू गरेको छ ।

शुक्रबार धनगढीमा आयोजना गरेको कार्यक्रममा नेपालको अति कम विकसित राष्ट्र (LDC) बाट विकासशील राष्ट्रमा हुने स्तरोन्नति मार्गदर्शनका बारेमा श्रोतव्यक्ति भोजराज पौडेलले प्रस्तुतिकरण गरेका थिए ।

कार्यक्रममा बोल्दै महासंघका केन्द्रीय वरिष्ठ उपाध्यक्ष सुरकृष्ण बैद्यले नेपालको अति कम विकसित राष्ट्र (LDC) बाट विकासशील राष्ट्रमा हुने स्तरोन्नतिका लागि तीन वर्षको समयावधि थपिएको बताए ।

उनले साना तथा मझौला उद्यमीहरु सक्षम नभएसम्म देशमा आर्थिक क्रान्ति सम्भव नहुने बताए । उनले भने ‘नेपालमा ठूला उद्योग घरानाभन्दा पनि साना तथा मझौला उद्यमहरूको प्रवद्र्धन हुँदैन, जबसम्म साना उद्योगहरूको व्यवस्थापन हुँदैन र साना उद्यमीहरूको औद्योगिक क्रान्ति हुँदैन, तबसम्म देशमा आर्थिक क्रान्ति सम्भव हुँदैन ।’

त्यस्तै, कार्यक्रममा बोल्दै डोटीका जोरायल गाउँपालिकाका अध्यक्ष दुर्गादत्त ओझाले सुदूरपश्चिममा पर्यटकीय क्षेत्रको सम्भावना हुँदाहुँदै पनि ओझेलमा परेको बताए । उनले यहाँका कृषि उद्यमी पनि बजारीकरणको समस्या भोग्दै आएकोले यसकामा संघ र प्रदेश सरकारले तदारुकता देखाउनुपर्ने बताए ।

कार्यक्रममा बोल्दै बेलौरी उद्योग वाणिज्य संघका सचिव रामेश्वर न्यौपानेले सरकारले व्यवसायिलाई प्रत्यक्ष लाभ हुने कार्यक्रम ल्याउनुपर्ने बताए । किसानको उत्पादन बिक्री नहुँदा खेर गइरहेको उनले बताए । घोडाघोडी उद्योग वाणिज्य संघका सचिव नारायण भण्डारीले व्यवसायीहरुले व्यवसायका बारेमा बुझेर अगाडि बढ्दा राम्रो हुने सुझाव दिए ।

गौरीगंगा उद्योग वाणिज्य संघका अध्यक्ष खेमानन्द पौडेलले भन्सारमा कडाइ नहुँदा यहाँका व्यापारी फस्टाउन नसकेको बताए । कार्यक्रममा बोल्ने अधिकांश वक्ताले सरकारले निजी क्षेत्रलाई प्रोत्साहन गर्नुपर्ने धारणा राखेका थिए ।

नेपाल उद्योग वाणिज्य महासंघ सुदूरपश्चिम प्रदेश अध्यक्ष पुष्पराज कुँवरको अध्यक्षतामा सम्पन्न कार्यक्रममा उद्योगी व्यवसायीको उल्लेख्य सहभागिता रहेको थियो ।