धनगढी । कैलालीको गौरीगङ्गा नगरपालिका-६, मोयास्थित भैरव आधारभूत विद्यालयमा दलित विद्यार्थी तथा दलित समुदायका अभिभावकमाथि जातीय छुवाछूत र विभेद गरिएको आरोपप्रति नेपाल दलित मोर्चा सुदूरपश्चिम प्रदेश समितिले गम्भीर ध्यानाकर्षण भएको जनाएको छ ।
नेपाली कम्युनिस्ट पार्टी नेकपा निकट नेपाल दलित मोर्चाले जारी गरेको प्रेस विज्ञप्तिमा विद्यालयमा दलित विद्यार्थी, विद्यालय व्यवस्थापन समितिका अध्यक्ष चक्र विक, पूर्व व्यवस्थापन समितिका अध्यक्ष तथा सदस्य, शिक्षिका बिना विक र कार्यालय सहयोगी लक्ष्मी दमाईमाथि जातीय आधारमा छुवाछुत तथा विभेद गरिएको उल्लेख छ ।
पीडित पक्षको उजुरीका आधारमा शिक्षक भगवती बडैला, भगवती रेग्मी र टेकराज उपाध्यायलाई प्रहरीले पक्राउ गरी अनुसन्धान अघि बढाएको मोर्चाले जनाएको छ ।
विद्यालयजस्तो सार्वजनिक शैक्षिक संस्थाभित्र पानी, खानपान, सामाजिक व्यवहार तथा सम्मानमा जातीय आधारमा विभेद गरिएको आरोप उठ्नु संविधान, कानुन र लोकतान्त्रिक गणतन्त्रका मूल्यमान्यतामाथि गम्भीर प्रश्न भएको मोर्चाको भनाइ छ ।
नेपालको संविधानको धारा २४ ले छुवाछुत तथा भेदभावलाई निषेध गरेको तथा जातीय तथा अन्य छुवाछुत र भेदभाव (कसुर र सजाय) ऐन, २०६८ ले समेत यस्तो कार्यलाई दण्डनीय कसुर मानेको मोर्चाले स्मरण गराएको छ ।
मोर्चाले पक्राउ परेका तीनै जनामाथिको अनुसन्धान निष्पक्ष, पारदर्शी र प्रभावकारी बनाउन प्रहरी प्रशासन, जिल्ला प्रशासन, स्थानीय तह तथा शिक्षा निकायसँग माग गरेको छ । साथै, प्रमाणबाट कसुर पुष्टि भए प्रचलित कानुनबमोजिम कडा कारबाही गर्नसमेत आग्रह गरेको छ ।
पीडित विद्यार्थी, शिक्षक तथा कर्मचारीको सुरक्षा, सम्मान र न्याय सुनिश्चित गर्न तथा विद्यालयलाई तत्काल जातीय छुवाछुतमुक्त शैक्षिक संस्थाका रूपमा स्थापित गर्न मोर्चाले सरकारसँग माग गरेको छ ।
भविष्यमा यस्ता घटना दोहोरिन नदिन प्रभावकारी संस्थागत व्यवस्था गर्नुपर्नेमा जोड दिँदै मोर्चाले जातीय छुवाछुत व्यक्तिगत व्यवहारको विषय मात्र नभई सामाजिक असमानता र विभेदविरुद्धको संघर्षको विषय भएको जनाएको छ ।
नेपाल दलित मोर्चाका सुदूरपश्चिम प्रदेश संयोजक जगत विक र सहसंयोजक चक्र विकद्वारा हस्ताक्षरित विज्ञप्तिमा राज्यले कुनै पनि दबाब, प्रभाव वा संरक्षणबाट मुक्त भएर कानुनको शासन, सामाजिक न्याय र समानताको पक्षमा दृढतापूर्वक उभिनुपर्ने उल्लेख गरिएको छ ।
