धनगढी- राष्ट्रियता लोकतन्त्र र समरुपतावाद प्रति समर्पित, दलित मुक्ति आन्दोलनका अगुवा योद्धा,एवं समरुपतावादी नेता स्व.चन्द्र बहादुर रैकाको १७ औँ स्मृति दिवस विविध कार्यक्रमका साथ मंगलबार धनगढीमा मनाइएको छ ।
चन्द्र पशुपति रैका स्मृति प्रतिष्ठानको आयोजनामा सम्पन्न कार्यक्रमका प्रमुख अतिथि सुदूरपश्चिम प्रदेशका सामाजिक विकास राज्यमन्त्री टेक बहादुर रैका रहेका थिए ।

कार्यक्रममा राज्यमन्त्री रैकाले स्व. चन्द्र बहादुर रैका शोषित पीडित जनताका लागि मरिमेट्ने एक सच्चा क्रान्तिकारी योद्धा भएको बताए । उनले स्व. रैकाले अँगाल्नु भएको समरुपतावादी सिद्धान्त अहिले पनि महत्त्वपूर्ण र सान्दर्भिक रहेको विचार व्यक्त गर्नुका साथै भावपूर्ण श्रद्धाञ्जली अर्पण गरे ।
कार्यक्रमका सहभागीहरुले स्व रैका एक सच्चा देशभक्त ईमान्दार र दलित एवं सीमान्तकृत वर्ग समुदायका लागि सदा सङ्घर्षशील नेता भएको बताउँदै राष्ट्रियता लोकतन्त्र मानवअधिकार सामाजिक न्याय समानता र दलित मुक्ति आन्दोलनमा स्व. रैकाको अतुलनीय र अनुकरणीय योगदान रहेको बताउँदै भावपूर्ण श्रद्धाञ्जली अर्पण गरेका थिए ।

यसै बिच रैकाको स्मृति दिवसको अवसरमा धनगढी स्थित आमाको माया छात्र बासमा रहेका असहाय र विपन्न बालकहरूलाई खाद्य तथा पोषण सामाग्री सहयोग गरिएको छ । जस अन्तर्गत चामल २५ केजी,तेल ५ लिटर,दाल ७ केजी,भुजा १० प्याकेट,चिउरा ६ प्याकेट,पिठो १० केजी,आलु ५ केजी,चाउचाउ १ पेटी,नुन ५ प्याकेट,चिनी ५ केजी,मास्क २ प्याकेट,बिस्कुट २ पेटी,साबुन २४ पिस,निरमा १० प्याकेट, लगायतको खाद्य सामाग्री सहयोग गरिएको थियो ।

उक्त सामाग्रीहरू कार्यक्रमका प्रमुख अतिथि राज्यमन्त्री टेक बहादुर रैकाले आमाको माया छात्र बासका प्रमुख संरक्षक रुद्र पन्त लाई हस्तान्तरण गरेका थिए । चन्द्र पशुपति रैका स्मृति प्रतिष्ठानका अध्यक्ष प्रेम विकको अध्यक्षतामा सम्पन्न उक्त कार्यक्रमको सञ्चालन प्रतिष्ठानका सचिव राजेन्द्र रैकाले गरेका थिए ।