काठमाडौं – राष्ट्रिय स्वतन्त्र पार्टीबाट ललितपुर–३ कि उम्मेदवार डा तोसिमा कार्कीको मनोनयन कायम राख्ने सर्वोच्च अदालतको आदेशप्रति असहमति प्रकट गर्दै निर्वाचन आयोग पुनः सर्वोच्चमा पुगेको छ ।
आयोगले सर्वोच्चका न्यायाधीश डा। कुमार चुडालको एकल इजलासबाट गरिएको प्रारम्भिक व्याख्यामा असहमति जनाउँदै त्यसको खारेजीको माग राखी शुक्रबार निवदेन दिएको हो ।
सर्वोच्च अदालतबाट आदेश र म्याद तामेल नहुँदै अनौपचारिक रुपमा त्यसको कानूनी प्रतिवाद गर्ने तयारी थालेको निर्वाचन आयोगले म्याद बुझेको केही घण्टामै अन्तरिम आदेश खारेज हुनुपर्ने माग राखी निवेदन दिने निर्णय गरेको थियो ।
निर्वाचन आयोगले विभिन्न आधार लिएर रास्वपाको ललितपुर–३ की उम्मेदवार कार्की लाभको पदमा नै रहेको जिकिर गरेको छ ।
अदालतले कात्तिक १५ गते प्रारम्भिक सुनुवाइपछि ललितपुर-३ मा राष्ट्रिय स्वतन्त्र पार्टीकी उम्मेदवार कार्कीको उम्मेदवारी तत्काल खारेज नगर्न आयोगलाई अन्तरिम आदेश दिएको थियो ।
