डोटी- नेपाली कांग्रेसका पूर्वकेन्द्रीय सदस्य आनन्द विष्टले डोटीका नौ वटै पालिकामा पुगेर नेता(कार्यकर्ताहरूलाई भेटेका छन्। केन्द्रीय प्रतिनिधिको विशेष जिम्मेवारीसहित डोटी खटिएका विष्टले सबै पालिकामा आयोजित चुनावी सभालाई सम्बोधन गर्दै पार्टीका नेता- कार्यकर्तालाई गठबन्धनको पक्षमा उभिन निर्देशन दिएका हुन्।
डोटीमा प्रदेश र संघमै प्रत्यक्षतर्फ कांग्रेस उम्मेदवार नहुँदा तपाईंहरूको मन दुख्नु स्वाभाविक हो। मुलुकमा राजनीतिक स्थायित्वका लागि गठबन्धन गर्नुपर्ने अवस्था सिर्जना भयो। सोही समीकरण मिलाउन डोटी कांग्रेसको भागमा परेन। यो अवस्थालाई हामीले बुझ्नुपर्छ, जोरायलमा आयोजित चुनावी सभामा विष्टले भने। उनले प्रत्यक्षतर्फ गठबन्धनको पक्षमा र समानुपातिकमा कांग्रेसलाई मतदान गर्न आग्रह गरे।
गठबन्धनको पराजयसँगै लोकतन्त्र र संविधानको स्थायीत्वनै जोखिममा पर्ने भएकाले यसतर्फ सबै सजग हुनुपर्ने विष्टको भनाइ छ। ‘म पनि डोटीबाट प्रत्यक्ष निर्वाचनमा बलियो आकांक्षी थिए। कांग्रेसबाट प्रधानमन्त्री ज्युले पनि मलाई डोटीबाट उठाउन चाहनु भएको थियो,उनले भने, गठबन्धनकै कारण कांग्रेस नेतृत्वमा सरकार बन्यो। र, मुलुक स्थिरतातर्फ गयो। हामीले पार्टीको निर्देशनलाई स्विकार्नुपर्छ।’
यस पटक डोटीमा कांग्रेसले टिकट नपाएकोमा विचलित नहुन उनले नेता-कार्यकर्तालाई आग्रह गरेका छन्। आफू सधैँ जनताको साथमा रहने बताउँदै उनले डोटेली जनताको विश्वासले नै स्थानीय तहमा जिल्लामा कांग्रेस बलियो बनेको बताए। त्यो विश्वासलाई डगमगाउन नदिन आफूले भरपुर प्रयासका साथै डोटेली जनताको पक्षमा काम गर्ने विष्टको भनाइ थियो।
कार्यकर्ताहरूमा आफ्नो पार्टीको उम्मेदवार नहुँदा निराशा छाएकोमा विशेष प्रतिनिधिका रूपमा आफू गइसकेपछि डोटीमा गठबन्धनका पक्षमा माहौल बनेको र समानुपातिकमा पनि कांग्रेसको मत बढ्ने उनले विश्वास व्यक्त गरे। म आइसकेपछि तपाईंहरूले मन खोलेर आफ्ना गुनासा राख्नु भएको छ। पार्टीप्रतिको चिन्ता व्यक्त गर्नु भएको छ। यो खुसीको कुरा हो। यहाँहरूमा मरेको उत्साहलाई जगाउँदै समानुपातिकमा पार्टीको पक्षमा मतदान गर्नुहोला। मैले समानुपातिकमा डोटीमा कांग्रेसले अत्यधिक मत ल्याउने विश्वास लिएको छु,ु उनले भने।
गठबन्धनका उम्मेदवारले जिते फेरि पनि कांग्रेसकै नेतृत्वमा सरकार बन्ने र काम गर्न सहज हुने उनले बताए। ‘फेरि पनि गठबन्धनकै सरकार बन्छ। त्यसको नेतृत्व कांग्रेसले गर्ने छ। एमाले अध्यक्ष केपी शर्मा ओली जीलाई दुई तिहाइको सरकारको नेतृत्व गर्ने अवसर दिँदासमेत उहाँले केही गर्न सक्नु भएन। झनै उहाँबाट संसद् र संविधानमाथि प्रहार हुने काम भयो। आफ्नै पार्टीलाई पनि टुक्राटुक्रा पार्नुभयो,’ विष्ट भन्छन्। यो अग्रगमनका पक्षमा उभिने बेला भएकाले लोकतान्त्रिक वाम गठबन्धनलाई मतदान गर्न उनको आग्रह छ।
डोटी कांग्रेसले पनि विष्टको अभियानलाई साथ दिन भन्दै सबै पालिका र संगठनलाई परिपत्र गरेको छ। स्थानीय तह निर्वाचनमा डोटीका नौ पालिका मध्ये सातमा प्रमुख र आठमा उपप्रमुख कांग्रेसले जितेको छ।
