काठमाडौं- नेपालले यूएईसँगको तीन खेलको एकदिवसीय अन्तर्राष्ट्रिय क्रिकेट सिरिज जितेको छ । शुक्रबार भएको अन्तिम तथा तेस्रो खेलमा यूएईलाई ६ विकेटले पराजित गर्दै नेपालले सिरिज २–१ ले जितेको हो ।
१७७ रनको सामान्य चुनौती पछ्याउँदै ब्याटिङ गरेको नेपालले ४०।१ ओभरमा चार विकेटको क्षतिमा लक्ष्य भेट्टायो । नेपालका लागि ओपनर आशिफ शेख र ज्ञानेन्द्र मल्लले उत्कृष्ट प्रदर्शन गर्दै नेपाललाई जित दिलाए । आशिफ ८८ रनमा अविजित रहे । त्यस्तै, ज्ञानेन्द्र मल्लले ७३ बलमा सात चौका र तीन छक्काको मद्दतमा ६४ रन बनाए ।
यसअघि टीयू क्रिकेट मैदानमा टस हारेर पहिले ब्याटिङ गरेको यूएईले खराब प्रदर्शन गर्दै निर्धारित ५० ओभरमा ९ विकेटको क्षतिमा १७६ रन मात्रै बनाएपछि नेपालले सामान्य चुनौती पाएको थियो । यूएईका लागि आयन अफ्जल खानले अविजित ५४ रन बनाए ।
त्यस्तै, हज्रात विलाल २० रनमा अविजित रहे । यूएईले ११ रनमा पहिलो विकेटको रूपमा मोहम्मद वासिमलाई ११ रनमा गुमाएको थियो । १६ रन हुँदा यूएईले दोस्रो विकेटको रूपमा भृत्या अरभिन्दलाई शून्यमा गुमाएपछि दबाबमा आएको थियो । यूएईका लागि अलिशान शराफूले ३३ र रोहन मुस्तफाले २४ रन बनाए । बलिङतर्फ नेपालका गुल्सन झा, दीपेन्द्रसिंह ऐरी र कुशल भुर्तेलले समान २–२ विकेट लिए ।
यसअघि पहिलो खेलमा नेपाल यूएईसँग ८४ रनले पराजित भएको थियो । त्यसपछि नेपालले दोस्रो खेलमा यूएईलाई तीन विकेटले पराजित गरेको थियो ।
