धनगढी- कैलाली निर्वाचन क्षेत्र नं ३ मा नागरिक उन्मुक्ति पार्टीको प्यानल नै विजयी भएको छ । प्रतिनिधि सभा सदस्यमा नागरिक उन्मुक्ति पार्टीका गंगाराम चौधरी यस अघि नै निर्वाचित भइसकेका छन् । यस्तै प्रदेश सभाको दुई वटै निर्वाचन क्षेत्रमा पनि नागरिक उन्मुक्ति पार्टीकै उम्मेदवार निर्वाचित भएका छन् ।
प्रदेश सभातर्फको (१) मा घनश्याम चौधरी विजयी भएका छन् । उनी १३ हजार ९२३ मत ल्याएर विजयी भएका हुन् । उनका निकटतम् प्रतिद्वन्द्वी नेपाली कांग्रेसका खेमराज चौधरीले ११ हजार ५७२ मत ल्याएका थिए । यस्तै नेकपा एमालेका राज बहादुर बुढाले ४ हजार ६३१ र राप्रपाका चुल्लु राम चौधरीले १ हजार ८५३ मत ल्याएका थिए ।
प्रदेश सभातर्फको (२) मा खुशीराम चौधरी ७ हजार ५३९ मतले विजयी भएका छन् । उनका निकटतम् प्रतिद्वन्द्वी नेकपा एकीकृत समाजवादीका अमर साउँदले ६ हजार ६१९ मत ल्याएका छन् ।
यहाँ जम्मा मत ३३ हजार ९२६ खसेको थियो । जसमा सदर मतको संख्या ३२ हजार ३०२ रहेको छ ।
