धनगढी- खाद्य प्रविधि तथा गुण नियन्त्रण कार्यालय धनगढीले चालु आर्थिक वर्षको पहिलो त्रैमासिक प्रगति विवरण सार्वजनिक गरेको छ ।
कार्यालयले पहिलो तीन महिनाको अवधिमा सुदूरपश्चिम प्रदेशका विभिन्न १२ वटा प्रतिकुल नमुनामाथि मुद्दा दायर गरेको छ ।
कार्यालयका सूचना अधिकारी हरिसिंह बोहराले खाद्य निरीक्षकबाट जिल्ला प्रशासन कार्यालय कैलाली र कञ्चनपुरमा गरि ११ र जिल्ला अदालत कार्यालय कैलालीमा १ गरि जम्मा १२ वटा प्रतिकुल नमुनामाथि मुद्दा दायर गरिएको जानकारी दिए । यस्तै खाद्य प्रविधित तथा गुण नियन्त्रण कार्यालय डोटीले गत आर्थिक वर्षदेखि लगत सरि आएका विभिन्न पाच्वटा प्रतिकुल नमुनाबारे सम्बन्धित यद्योगी व्यवसायीहरुसंग बयान लिने कार्यसमेत भइरहेको उनले बताए । उनका अनुसार गत आर्थिक वर्षदेखि लगत सरि आएका १९ उद्योगी व्यवसायीहरुसंग बयान लिने, सरकारी वकिलबाट राय निकासा लिनेलगायतका कार्य भइरहेको छ ।
यो अवधिमा कार्यालयले विभिन्न २४ उद्योग दर्ताका लागि सिफारिस गरेको, १३ खाद्य र १ दाना उद्योगको अनुज्ञा पत्र नविकरण गरेको छ । पहिलो तीन महिनाको अवधिमा २४ खाद्य तथा दाना उद्योग, ३७ वटा होटेल रेष्टुरेन्टको अनुगमन गरिएको छ । तीमध्ये होटेल रेष्टुरेन्टतर्फ डडेल्धुराका १२, डोटीका १४ र बैतडीका ११ स्थानमा तीन महिनाको अवधिमा अनुगमन गरिएको जनाइएको छ । यसैगरी खाद्य बजार तर्फ डडेल्धुरामा २० पटक, डोटीमा १७ पटक र बैतडीमा २१ पटक बजार अनुगमन गरिएको सूचना अधिकारी बोहराले बताए ।
तीन महिनामा खाद्य प्रविधि तथा गुण नियन्त्रण कार्यालयले ६ लाख ७८ हजार ५ सय ३० रुपैयाँ राजस्व संकलन गरेको छ । खाद्य प्रविधि तथा गुण नियन्त्रण कार्यालय धनगढीका प्रमुख नवराज दहालले उपभोग्य वस्तु प्रयोग गर्दा गुणस्तरको अवस्था बारेमा जानकारी लिनुपर्ने बताए । उपभोक्ता सचेत भए मात्रै उद्योगी व्यवसायी पनि सचेत हुने उनले बताए ।
कार्यालय प्रमुख दाहालको अध्यक्षतामा भएको कार्यक्रममा उपभोक्ता हकहित संरक्षण मञ्च सुदूरपश्चिम प्रदेश सचिव भोजराज जोशी र नेपाल पत्रकार महासंघ कैलालीका अध्यक्ष हिमालय जोशीले पनि बजार अनुगमनमा ध्यान दिनुका साथै कारबाही प्रक्रियालाई मजबुद बनाउनुपर्ने धारणा राखेका थिए ।
