बाजुरा- यसअघि मंसिर ४ गते स्थगित भएको बाजुराको बुढिनन्दा ५ को मतदान शनिबार शान्तिपूर्ण रुपमा सम्पन्न भएको छ । ९ सय ९९ मतदाता रहेको मतादन केन्द्रमा ५ सय ९७ जनाले मतदान गरेको निर्वाचन कार्यालय बाजुराले जनाएको छ । २ सय ८५ जना महिला र ३ सय १२ पुरुषले मतदान गरेको निर्वाचन कार्यालयका प्रमुख नवराज अवस्थीले बताए । उनका अनुसार मतदानको समयमा सामान्य विवाद समेत नभएर शान्तिपूर्ण रुपमा मतदान सम्पन्न भएको हो ।
मंसिर ४ गते २८ मत खसेको थियो । मतदना शुरु भएको केही समयमै काँग्रेस र एमालेका कार्यकर्ताबीच झड्प हुँदा मतदान अधिकृतले सूचना टाँस गरेर मतदान स्थगित गरेका थिए । निर्वाचन आयोगले मंसिर १० गते पुनः निर्वाचन गर्ने गरि चुनाव मिति तोकेको थियो ।
शनिबार सम्पन्न भएको मतदानसँगै बाजुरामा मतदान सम्पन्न भएको छ । तर काँग्रेसले ८ वटा मतदान केन्द्र र एमालेले १५ वटा मतदान केन्द्रमा पुनः मतदान हुनुपर्ने माग राखेको छ । मतदान केन्द्र कब्जा भएर फर्जि भोट खसाएको एकअर्काले आरोप लगाएका छन् ।
केही मतदान केन्द्र कब्जा भएको जानकारी पछि निर्वाचन आयोगको टोली बाजुरा अनुगमनमा पुगेको छ । आयोगका सहसचिव तुलसी श्रेष्ठको नेतृत्वमा तीन सदस्यीय टोली बाजुरा पुगेर छानबिन गरिरहेको छ । राजनीतिक दल, मतदान अधिकृत, सुरक्षा प्रमुखलार्इ भेटेर त्यहाँको अवस्थाबारे जानकारी लिने कार्य भइरहेको निर्वाचन आयोगले जनाएको छ ।
