बाजुरा- बाजुराको त्रिबेणी नगरपालिका वडा नम्बर ७ का चेतन अयडीको शव ६ दिनसम्म पनि आफन्तले बुझेका छैनन् । अनेरास्ववियुका केन्द्रिय सदस्यसमेत रहेका चेतनका हत्यारालाई पक्राउ नगर्दासम्म शव नउठाउने आफन्तले अडान लिएका छन् ।

चेतनका आफन्तले हत्यामा संलग्न भएको भन्दै २२ जनाबिरुद्ध जिल्ला प्रहरी कार्यालय बाजुरामा किटानी जाहेरी दर्ता गराएका छन् । २२ जनामध्ये २ जनालाई प्रहरीले प्रक्राउ गरि अनुसन्धान शुरु गरेको छ । घटनाका मुख्य योजनाकार पक्राउ नपर्दासम्म शव नबुझ्ने चेतनका बुवा गगन अयडीले बताए । शव अहिले अस्पताल बाजुराको शवगृहमा राखिएको छ ।

नेकपा एमाले बाजुराले पनि चेतनको हत्यारालाई पक्राउ गरि दोषी माथि कार्यवाहीको माग गर्दै मंसिर ५ गतेदेखि बाजुरामा आन्दोलन गरिरहेको छ । मंसिर ४ गते त्रिवेणी ७ मा नाटेश्वरी आधारभूत विद्यालयमा मतदानको विवादलाई लिएर एक समूहले चेतनको घरमा पुगेर साँझ कुट्पिट गरेर हत्या गरेको थियो ।

अयडि घर भित्र रहेको बेला घर भित्रबाट तानेर उनलार्इृ निर्घात कुटपिट गरिएको थियो । अयडीलाई उपचारका लागि अछामको बयलपाटा अस्पतालमा लगिएपनि चिकित्सकले उनको मृत्यु भएको घोषणा गरेका थिए । बयलपाटा अस्पतालबाट पोष्टमार्टम गर्नका लागि चेतनको शव अस्पताल बाजुरामा ल्याइएको थियो । चेतनको पोष्टमार्टम गरेको भएपनि शव उठन सकेको छैन् ।

त्रिबेणी ७ मा दिउँसो मतदानको समयमा नेपाली काँग्रेसका कार्यकर्ताले बुथ कब्जा गर्न खोजेपछि सुरक्षाकर्मीले गोली चलाउदा त्रिवेणी ७ बस्ने सञ्जिब अयडीको मृत्यु भएको थियो । सञ्जिबको मृत्यु भए पश्चात विवादले चर्को रुप लिएको थियो । सञ्जिब अयडीको मृत्युपछि काँग्रेस कार्यकर्ताले घर–घरमा गएर अनेरास्ववियुका केन्द्रिय सदस्य चेतन अयडीलगायत एमाले कार्यकर्ता माथि कुटपिट गरेको आरोप लागेको छ ।

सुरक्षाकर्मीको गोली लागेर मृत्यु भएका सञ्जिब अयडीको भने शुक्रबार आफन्तले शव बुझेर दासंस्कार गरिसकेका छन् । जिल्ला प्रशासन कार्यालय बाजुराका अनुसार मृत्यु भएका दुबै जनाको क्षतिपूर्तिका लागि गृहमन्त्रालयमा जानकारी गराइएको छ । दुई जनाको मृत्युपछि अहिले बाजुरा अशान्त छ ।

जिल्लामा शनिबार मतगणना भएपनि मतगणना अझै अनिश्चित जस्तै भएको बताइएको छ । मंसिर ४ गते २८ मत खसेपछि विवाद भएको बुढिनन्दामा शनिवार कडा सुरक्षाकाबीच चुनाव सम्पन्न भएको छ ।