डडेल्धुरा- डडेल्धुराको भित्री मधेश क्षेत्र जोगबुढाका खेतमा सिँचाइ गर्न एक करोड ६० लाख रकम खर्च गरेर नहर निर्माण भइरहेको छ। जोगबुढा क्षेत्रको परशुराम नगरपालिका–५, परीगाउँमा एक करोड २० लाख रुपियाँ लागतमा परीगाउँ सिँचाइ योजना निर्माणको काम भइरहेको छ। चालू आर्थिक वर्ष २०७९र८० मा १० किलोमिटर लामो नहर निर्माण गरेर परीगाउँको तीन सय हेक्टर क्षेत्रफलमा सिँचाइ गर्ने योजनासहित सिँचाइ योजना निर्माणको काम भइरहेको जलस्रोत तथा सिँचाइ कार्यालय डडेल्धुराले जानकारी दिएको छ।

अपर परीगाउँ सिँचाइ योजना ६० लाख रकम र लोवर परिगाउँ सिंचाई योजना ८० लाख रुपियाँ गरेर एक करोड २० लाख रुपियाँ लागतमा दुईवटा सिँचाइ योजना निर्माणको काम भइरहेको कार्यालयका प्राविधिक रोशन भट्टले बताए। यसैगरी परशुराम नगरपालिका–६ को मिलखेतमा ४० लाख रुपियाँ लागतमा पाँच सय मिटर लामो नहर निर्माणको चरणमा छ।

गत आर्थिक वर्ष २०७८/७९ मा नहर निर्माणको कामको थालनी गरेर चालू आर्थिक वर्षभित्रसम्म पूरा गर्ने गरेर काम भइरहेको प्राविधिक भट्टले बताए। सिमल खेत क्षेत्रका तीनवटा बस्तीका दुई सय हेक्टर क्षेत्रफलमा सिँचाइ गर्ने उद्देश्यका साथ सर्गौणा, सिमलखेत, ठन्नजाला सिँचाइ योजना निर्माणको काम भइरहेको उनले बताए।

सिमलखेतमा २०६२ सालमा आएको बाढीले पूरै बस्ती नै विस्तापित भएको थियो। पन्तुरा खोलाको बाढीले बस्तीसहित खेत बगरमा परिणत गरेको थियो। ३२ करोड रुपियाँ लागतमा पन्तुरा र रङ्गुन खोलमा तटबन्ध लगाइएपछि चार वर्ष यता सिमलखेतवासी सिमलखेतमा पुनः स्थापित भइरहको छन्। आर्थिक वर्ष २०७४/७५ मा ठेक्का सम्झौता भएर गत आर्थिक वर्ष २०७८/७९ मा तटबन्ध निर्माणको काम भएको जलस्रोत तथा सिँचाइ कार्यालय डडेल्धुराले जानकारी दिएको छ।

रङ्गुन खोलामा पाँच हजार चार सय मिटर र पन्तुरा खोलामा एक हजार मिटर लामो तटबन्ध निर्माण गरिएको छ। स्थानीयहरू बगरमा आआफ्नो खेतबारी खोज्दै खेतपाती गर्न थाल्नुभएको छ। भट्टका अनुसार परशुराम नगरपालिका–३ शीर्ष गाउँमा ३० लाख रुपियाँ लागतको सिँचाइ योजना निर्माणको काम भइरहेको छ।

शीर्ष गाउँको चार सय हेक्टर क्षेत्रमा सिञ्चित हुने गरेर योजना निर्माण गरिन लागेको हो। आठ किलोमिटर लामो नहर निर्माण गरेर सिँचाइ योजना निर्माणको काम भइरहेको छ। भित्री मधेश क्षेत्रका यी योजनाहरू लगायत डडेल्धुरामा चालू आर्थिक वर्षमा १४१ वटा योजना निर्माणको चरणमा रहेका छन्।

ती योजनाहरू निमार्णका लागि ३२ करोड ३० लाख रुपियाँ रहेको सिँचाइ कार्यालयले जानकारी दिएको छ। गत आर्थिक वर्ष २०७८/७९ मा २८ करोड ३२ लाख ६० हजार रकममा १२१ सिँचाइका योजना निर्माणको काम थालिएको थियो। यीमध्ये ७४ पूरा भएका छन्। अन्य योजनाहरू क्रमागत योजनामा रहेका थिए। केही योजनाहरू चालू आर्थिक वर्षमा सम्पन्न हुने कार्यालयले जनाएको छ।गोरखापत्रबाट