धनगढी- धनगढीमा बिहिवार (आज)देखि सुरु भएको सुदूरपश्चिम प्रदेश महोत्सवको उद्घाटन समारोहमा प्रधानमन्त्री शेरबहादुर देउवालाई १५ बुँदे मागसहित १५ किलो माला लगाइएको छ ।
महोत्सव सुरुवातदेखि विभिन्न माग राख्दै प्रमुख अतिथिलाई माग बरारबरका बुँदा अनुसारको माला लगाउने कार्य अन्तर्गत महोत्सव आयोजक कैलाली उद्योग वाणिज्य संघले यस वर्ष प्रमुख अतिथि प्रधानमन्त्री देउवालाई १५ किलोको माला लगाएको हो ।
उक्त माला कैलाली उद्योग वाणिज्य संघका अध्यक्ष पुष्पराज कुँवरसहित पदाधिकारीहरुले प्रमुख अतिथिलाई लगाइदिए । माला लगाइदिए पश्चात १५ बुँदे मागसहितको पत्र प्रधानमन्त्री देउवालाई बुझाइएको छ ।
२०६३ सालबाट २१ बुँदे मागसहित प्रमुख अतिथिलाई २१ किलोको माला लगाइदिएर सुरु भएको महोत्सवमा यस वर्ष प्रमुख अतिथिलाई १५ किलोको माला लगाइएको संघका महासचिव ओम विष्टले बताए। उनले २१ बुँदाबाट केही माग पूरा भइसकेको र अपूरो बुँदा अनुसार प्रधानमन्त्रीलाई माला लगाइको बताए ।
१५ बुँदे मागको पहिलो नम्बरमा धनगढीमा प्रदर्शनी स्थलको निर्माण गरिनुपर्ने माग छ । प्रदेशको गौरीफण्टा नाका स्तरोन्नति, धनगढी विमानस्थल स्तरोन्नति, औद्योगिक ग्राम स्थापना, गौरिफण्टादेखि मानसरोवर जोड्ने सडक, आइटी हब निर्माणलगायतका माग छन् ।
०६३ सालमा महोत्सव सुरुवात गर्दा धनगढी विमानस्थल स्तरोन्नतिका लागि एक रुपैयाँ अभियान सुरु गरिएको थियो। सो अभियान अहिले महोत्सवको १६औं संस्करणमा पुग्दा पाँच रुपैयाँ बनाइएको छ।
