धनगढी– कैलालीको लम्कीचुहा नगरपालिकाकी मेयर सुशीला शाहीले पत्रकारलाई बन्धक बनाएर फुटेज डिलिट गर्न लगाएको घटनाप्रति पत्रकार महासंघ कैलालीको ध्यानाकर्षण भएको छ ।

मेयर शाहीले न्युज २४ मा कार्यरत पत्रकार खेम ढुङ्गानालाई बन्धक बनाएर फोटो भिडीयो डिलीट गर्न लगाएको आरोप लागेपछि महासंघले विज्ञप्ति जारी गर्दै ध्यानाकर्षण भएको जनाएको हो । मेयर शाहीले आफ्नो निजी निवास निर्माण गर्न नगरपालिकाका सवारीसाधन प्रयोग गरिरहेको सूचनाका आधारमा रिपोर्टिङमा खटिएका पत्रकार ढंगानालाई केही घण्टा नियन्त्रणमा लिएर बन्धक बनाएको आरोप छ ।

आफूलाई नजिकैको होटलमा लगेर मोबाइलसहित आफूलाई नियन्त्रणमा लिएर खिचेका सबै तस्बिर तथा भिडिओ डिलिट गर्न लगाएको ढुङ्गानाले बताएका छन् । रिपोर्टिङको क्रममा पत्रकारले खिचेका फोटो, भिडियो नै डिलिट गर्न लगाउनु गलत भएको पत्रकार महासंघ कैलालीका अध्यक्ष हिमालले जोशीले बताए ।

इलाका प्रहरी कार्यालय लम्कीका प्रमुख शंकर खड्काले घट्नाबारे थप बुझ्ने प्रयास भइरहेको बताएका छन् । मेयर शाही र ढुंगानाबीच करिव आधा घण्टा कुरा भएपछि आफू त्यहाँ पुगेको उनले बताए । सामान्य रूपमा दुबैबीच एउटा होटेलमा बसेर कुराकानी भएको र त्यसपछि फोटो र भिडिओ डिलिट गर्न लगाएको प्रमुख खड्काले बताए ।

समाचारको विषयमा चित्त नबुझे उजुरी गर्ने विभिन्न निकाय हुँदाहुँदै पनि मेयर शाहीले पत्रकारलाई नियन्त्रणमा लिएर समाचारका लागि लिइएको भिडिओ तथा फोटोहरू मेटाउन लगाउनु र हातपात समेत गर्नु खेदजनक भएको पत्रकारका विभिन्न संगठनहरूले पनि आपत्ति जनाएका छन् । प्रेस युनियन कैलाली, प्रेस चौधरी, प्रेस संगठन कैलालीले विज्ञप्ति जनाउँदै घटनाप्रति विरोज जनाएका हुन् ।