धनगढी– कैलालीको लम्की चुहा नगरपालिकाकी नगर प्रमुख सुशीला शाहीले आफ्नो निर्माणाधीन घर बनाउने क्रममा नगरपालिकाको सवारीसाधन र औजार प्रयोग भएको स्वीकारेकी छिन् ।
सोमबार एक विज्ञप्ति जारी गर्दै मेयर शाहीले ठेकदारले आफूलाई जानकारी नगराइ एक/दुई पटक घर निर्माणमा नगरपालिकाको सवारीसाधन औजार प्रयोग भएकोमा आफूले गल्ती महसुस गरेको उल्लेख गरेकी छिन् ।
सोही विषयमा प्रतिक्रिया लिन पुगेका न्युज २४ टेलिभिजनका पत्रकार खेम ढुङ्गानालाई बन्धक बनाइ फुटेज डिलिट गर्न नलगाएको उनले विज्ञप्तिमार्फत जनाएकी छिन् ।
उनले प्रेस विज्ञप्ति जारी गर्दै वैयक्तिक गोपनीयता सम्बन्धी ऐन, २०७५ को दफा ३ को उपदफा ४ विपरीत काम गरेका कारण ढुङ्गानाले खिचेको भिडियो आफैले मेटाएको बताएकी हुन् ।
मेयर शाहीले भिडिओ डिलिट पश्चात् पत्रकार ढुङ्गानाले वार्गेनिङ गरेको आरोपसमेत लगाएकी छन् ।
विज्ञप्तिमा भनिएको छ –‘भिडियो डिलिटको केही समयपश्चात् मेरो घरमा आएर मेरो मिडियासमेत नगरपालिकामा सूचीकृत छ । मलाई पनि काम दिनुपर्यो भनेर निस्केको तर, के कति कारणले कपोकल्पित समाचार विभिन्न सञ्चारमाध्यममा सम्प्रेषण भए ।’ तथ्यहीन समाचारका पछि नलाग्न उनले आग्रहसमेत गरेकी छन् ।
आइतबार रिपोर्टिङको क्रममा नगर प्रमुख शाहीले केही मानिसहरुसहित आएर आफूलाई नजिकैको होटेलमा लगेर मोबाइल र आफूलाई नियन्त्रणमा लिएर खिचेका सबै तस्बिर तथा भिडिओ डिलिट गर्न लगाएको ढुङ्गानाको आरोप छ ।
