धनगढी- कैलालीको अत्तरियाका सुनचाँदी व्यवसायीहरू आन्दोलित बनेका छन् । आइतबार साँझ सुन व्यवसायी माथि गोली प्रहार भएपछि दोषीलाई पक्राउ गर्न र सुरक्षाको प्रत्याभूति गर्न माग गर्दै उनीहरु आन्दोलित बनेका हुन् । उनीहरुले सुनचाँदी पसलहरु बन्दा गराएका छन् ।
व्यवसायीहरूमा त्रास बढेको र सुरक्षाको अनुभूति नभएको भन्दै व्यवसाय नै बन्द गर्नुपरेको सुनचाँदी व्यवसायी सङ्घ कैलालीका अध्यक्ष कमलप्रसाद लामिछानेले बताए । उनले व्यवसायीलाई आक्रमण गर्नेलाई तत्काल पक्राउ गर्नसमेत प्रहरीसँग माग गरे ।
गोदावरी नगरपालिका १ मा रहेको न्यु घोडाघोडी सुनचाँदी पसलका सञ्चालक २८ वर्षीय विकास सुनारमाथि सोमबार बेलुका मोटरसाइकलमा आएका दुई जनाको समूहले गोली प्रहार गरेको थियो ।
सेतो कलरको अपाची मोटरसाइकलमा आएका उनीहरुले सुनारसंग रहेको करिब ३३ तोला सुन लुटेर फरार भएको जिल्ला प्रहरी कार्यालय कैलालीका प्रवक्ता प्रहरी नायब उपरीक्षक (डीएसपी) वेदप्रकाश जोशीले बताए ।
‘हामीले घाइतेलाई सोधपुछ गरिरहेका छौं अहिलेसम्म त्यस्तो केही तथ्य बाहिर आएको छैन,’ उनले भने, ‘अनुसन्धान जारी छ । यसलाई हामीले गम्भीर रूपमा लिएका छौ ।’ अनुसन्धान पश्चात सत्यतथ्य बाहिर ल्याउने डीएसपी जोशीले बताए ।
