काठमाडौं– संसदमा १२ सिट सहित पाँचौं र सत्ता गठबन्धनमा चौथो स्थानमा रहेको जनता समाजबादी पार्टी (जसपा)ले पनि उपप्रधानमन्त्री पाउनुपर्ने अडान राखेको छ । सरकारको तीन उपप्रधानमन्त्री भइसकेको अवस्थामा जसपाले पनि सोही पदमा अडान राखेको हो ।
जसपाका अध्यक्ष उपेन्द्र यादवले गठबन्धन आवद्ध दलका शीर्ष नेतासँग उपराष्ट्रपति र उपप्रधानसहित तीनवटा मन्त्रालय र मधेश प्रदेशमा मुख्यमन्त्री आफूले पाउनुपर्ने दवाद दिँदै आएका छन् । तर जसपाले सरकारलाई समर्थन गरेपनि सहभागिताको विषयमा भने केही निर्णय गरेको छैन ।
जसपाले बुधबार रामसहाय यादवलाई संसदीय दलको नेता चुनेको छ । अध्यक्ष यादवले सरकारमा सहभागी हुन आफ्नो पार्टीको मागबारे नेकपा एमाले अध्यक्ष केपी शर्मा ओली र नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल‘प्रचण्ड’सँग औपचारिकरुपमा प्रस्ताव राखिसकेका छन् ।
मधेस प्रदेशमा १६ वटा सिट रहेको जसपाले मधेस सरकारको नेतृत्व आफूले पाउनुपर्ने दाबीलाई ‘बटमलाइन’ बनाएको छ । मधेश प्रदेशमा जनमत पार्टीले पनि मुख्यमन्त्री दाबी गर्दै आएको छ । मधेस प्रदेशसभामा जनमतको १३ सिट छ । जसपा अध्यक्ष यादव वर्तमान सत्ता गठबन्धनमा रहेर मधेसमा आफ्नो पार्टीको सरकार सुनिश्चित गर्न चाहन्छन् ।
सत्ता गठबन्धनमै रहेको जनमतले पनि मधेस सरकारको नेतृत्वमा दाबी गर्दै आएपनि औपचारिक सहमति भने भइसकेको छैन । जसपा संसदीय दलका नेता रामसहाय यादवले आगामी केन्द्रीय कार्यकारिणी समितिको बैठकले सरकारमा सहभागीता, आगामी रणनीतिबारे ठोस निर्णय लिने बताए ।
गठबन्धनभित्र मधेश प्रदेशमा जसपा र जनमतलाई आलोपालो मुख्यमन्त्री दिने विषयमा समेत छलफल भइरहेको छ। मधेश प्रदेशको ठूलो दल एमाले हो । यद्यपी एमालेले मधेशबाहेक अन्य चार प्रदेशमा मुख्यमन्त्री लिने विषयमा प्रचण्ड र एमाले अध्यक्ष ओलीबीच समझदारी भइसकेको छ ।
