कैलाली- केही सातायता बस्तीमै बाघ डुल्न थालेपछि कैलालीको दक्षिणी क्षेत्रका स्थानीय त्रसित भएका छन् । जिल्लाको कैलारी गाउँपालिका ७ र ५ नं. वडाका विभिन्न बस्तीहरूमा बाघको त्रास फैलिएको हो । स्थानीयले सो बाघ भारतको दुधुवा नेशनल पार्कबाट वसन्ता कोरिडोर हुँदै बस्तीसम्म पुग्नेको आशंका व्यक्त गरेका छन् ।

सो बाघ नरभक्षी रहेको आशंका बढेपछि झनै स्थानीयहरू त्रसित भएका हुन् ।​स्थानीयका अनुसार गर्दनमा ‘बेल्ट’ जस्तो बाँधिएको बाघ केही सातादेखि गाउँ, खेततिर देखिने गरेको छ । बाघको गर्दनमा बेल्ट बाँधिएको जस्तो देखिएको वस्तु सम्भवतः ‘रेडियो कलर’ जडान गरिएको हुनुपर्छ ।

प्रायः दिनहुँ बाघ देखिन थालेपछि स्थानीय पालिकाले सतर्कता अपनाउन अनुरोध गरेको छ । गाउँपालिकाको ७ नं. वडा कार्यालयले बिहीबार एक सूचना जारी गरी स्थानीयलाई सतर्कता अपनाउन अनुरोध गरेको हो । गाउँपालिकाका प्रवक्ता समेत रहेका ७ नं. वडाध्यक्ष दीपेन्द्र बमले बाघ देखिएको अवस्थामा इलाका प्रहरी कार्यालय हसुलिया, सशस्त्र प्रहरी बल पोष्ट रामपुर, सबडिभिजन वन कार्यालय वसन्ता वा वडा कार्यालयलाई तत्काल जानकारी गराउन अनुरोध गरेको बताए ।

मान्छेले खेतमा जाने क्रममा दिउँसै पनि बाघ देखेको कैलारी गाउँपालिका–७ का खेमराज चौधरीले बताए । उनका अनुसार डेढ साताअघि मात्रै सोही वडाको विपतपुरस्थित वन र कटैनी नदी क्षेत्रमा दिनभरि बाघ देखा परेको थियो । यसैगरी वसन्तास्थित उखुबारीमा पनि बाघ पुग्ने गरेको बताइएको छ ।

वसन्ता वन क्षेत्र नजिक बाघले छाडा गाई पनि मारेको उनको भनाइ छ । खेत जाने क्रममा केही मान्छे झन्डै बाघसँगको जम्काभेटबाट जोगिएको जनाइएको छ । गहुँ सिँचाइका लागि खेतमा जाने क्रममा बाघ देखिएको थियो । उनीहरूले होहल्ला गरेपछि बाघ अन्यत्र गएको बताइएको छ । बाघको त्रास बढेपछि साँझ पर्ने बित्तिकै वसन्ता, रामपुर, भुइँयाफाँटा, बैजपुर, विपतपुर, तिघरीलगायतका गाउँ सुनसान हुने गरेको स्थानीयले बताएका छन् ।

उक्त बाघ भारतको दुधुवा नेसनल पार्कबाट आएको स्थानीयले बताएका छन् । भारतको सीमावर्ती गाउँतिर पनि त्यो बाघ देखा परेको बताइएको छ । सीमावर्ती भारतीय गाउँ बेलापरसुवाका लल्लन कठरियाले आफ्नो गाउँको आसपास क्षेत्रमा पनि स्थानीयले बाघ देखेको बताए ।

उनका अनुसार केही दिनअघि भारतको सम्पूर्णनगर नजिक रहेको मरौचा गाउँका एक १५ वर्षीय किशोरलाई बाघले आक्रमण गरी मारेको थियो । त्यसपछि बाघ नरभक्षी भएको भन्दै भारतीय अधिकारीले सो बाघलाई सुध्रिनका लागि रेडियो कलर जडान गरेर दुधुवा नेसनल पार्कको सलुखापुर क्षेत्रमा छोडेका थिए ।

‘त्यो बाघ दुधुवामा नबसी गाउँतिर आइरहेको छ । अहिले गाउँतिर देखा परिरहेको बाघ सम्भवतः त्यही नरभक्षी बाघ हो । दुधुवा छोडिएको बाघ गाउँतिर आउन थालेपछि दुधुवा नेसनल पार्क आसपासका भारतीय गाउँमा पनि त्रास बढेको छ । यहाँ पनि गाउँ नजिकै खेतमा आएर गाईलाई मारेर खाएको छ’, कठरियाले भने ।

राष्ट्रिय निकुञ्ज तथा वन्यजन्तु संरक्षण विभागका सूचना अधिकारी डा. गणेश पन्तले बाघका कारण सम्भावित क्षति हुन नदिन भारतीय अधिकारी, प्रदेश सरकारको उद्योग, पर्यटन, वन तथा वातावरण मन्त्रालय र जिल्ला वनसँग समन्वय भइरहेको बताए ।

उनले भने, ‘नयाँ दिल्लीस्थित अधिकारीहरूसँग कुरा भइसकेको छ । दुधुवाका बाघमा रेडियो कलर जडान गरिएको भए पनि गाउँतिर आइरहेको बाघ नरभक्षी हो वा अरू कुनै हो, त्यो पछि मात्रै थाहा हुन्छ । हाम्रो पहिलो ध्यान मानवीय क्षति हुन नदिनु हो ।’