काठमाडौं- उपप्रधान तथा गृहमन्त्री रवि लामिछानेको नागरिकतासम्बन्धी विवादको मुद्दामा सर्वोच्च अदालतको संवैधानिक इजलासमा बहस सकिएको छ। लामिछानेका तर्फबाट ३ जना कानुन व्यवसायीले बहस गरे।
लामिछानेको प्रतिरक्षा गर्दै बहसमा उत्रिएका कानुन व्यवसायीहरुले रवि नेपाली नागरिकताबारे बहस गर्नु अनावश्यक भएको जिकिर गरेका छन् । उनीहरुले गृहमन्त्रालयले नै यसअघि नै उनी नेपाली नागरिक हुन् भनेर भनिसकेकाले त्यसबारे अनावश्यक विवाद गर्नु आवश्यक नभएको बताएका हुन् ।
लामिछानेका तर्फबाट बहसमा उत्रिएका वरिष्ठ अधिवक्ता सुशील पन्त, सुनिल पोखरेललगायतले बहस गरेका थिए । रिट निवेदकका तर्फबाट वरिष्ठ अधिवक्ता विष्णु लुइँटेल, रमण कर्णलगायतले बहस गरेका थिए ।
लामिछानेको सांसदको योग्यताबारे प्रश्न उठाउँदै अधिवक्ता रविराज बसौला, युवराज पौडेल लगायतले मुद्दा दायर गरेका थिए। राष्ट्रिय स्वतन्त्र पार्टीका (रास्वपा) का सभापतिसमेत रहेका लामिछाने प्रतिनिधि सभा सदस्यमा निर्वाचित भएलगत्तै रिट दायर भएको थियो।
लामिछानेले नेपाली नागरिकता नलिइ राजनीतिक दल खोलेको, प्रतिनिधि सभा निर्वाचनमा प्रतिस्पर्धा गरी सांसद बनेको भन्दै उनको सांसद पद खारेजको माग गर्दै सर्वोच्च अदालतमा रिट दायर भएको थियो। सर्वोच्च अदालत प्रशासनले केही बेरमा आदेश जारी हुने जनाइएकाृ छ ।
