धनगढी – सुदूरपश्चिम प्रदेश सरकार गठनमा निर्णायक देखिएको नागरिक उन्मुक्ति पार्टीले निर्णय लिन ढिलाइ गर्दा अन्योल सिर्जना भएको छ । नागरिक उन्मुक्ति पार्टीले प्रदेश सरकारमा सहभागी हुने विषयमा निर्णय लिन नसक्दा अहिलेको सत्तारुढ गठबन्धनको नेतृत्वमा सरकार गठनमा ढिलाइ भएको हो ।
आइतबार वालुवाटारमा बसेको गठबन्धनको बैठकले सुदूरपश्चिम प्रदेश सरकारमा एमाले र माओवादीले आलोपालो गर्ने तथा नागरिक उन्मुक्ति पार्टीलाई उपसभामुख दिन प्रस्ताव गरेको थियो ।
पहिलो चरणमा एमाले र दोस्रो चरणमा माओवादीले नेतृत्व गर्ने सहमतिअनुसार यहाँ एमाले संसदीय दलका नेता राजेन्द्र रावल मुख्यमन्त्री बन्नेछन् ।
तर नागरिक उन्मुक्ति पार्टीले समर्थन नगरेको अवस्थामा भने सरकार बन्ने अवस्था छैन । सोही कारण दुवै दलका नेताहरु उन्मुक्ति पार्टीलाई जसरी पनि सरकारमा लैजाने रणनीतिमा छन् । नागरिक उन्मुक्ति पार्टीले भने सत्तारुढ गठबन्धनसँग सरकारमा सहभागी हुने, नहुने विषयमा निर्णय लिन २४ घण्टाको समय मागेको छ ।
उक्त पार्टीका प्रवक्ता दामोदर पण्डितले सरकारका सम्बन्धमा संस्थापक रेशम चौधरीले निर्णय लिने भएकाले अहिलेसम्म कुनै पनि निर्णय नभएको जानकारी दिए ।
यहाँ नेकपा माओवादी केन्द्रका ११, एमालेका १०, नागरिक उन्मुक्ति पार्टीका ७ र राप्रपाका एक जना सांसद गरेर गठबन्धनको पक्षमा २९ जना छन् । सबैभन्दा ठूलो नेपाली कांग्रेसका १९, नेकपा (एकीकृत समाजवादी) का ४ र एक जना स्वतन्त्र सांसद छन् ।
