धनगढी- सुदूरपश्चिम प्रदेशमा सरकारको मुख्यमन्त्रीमा दाबी पेस गर्ने समय सकिनै लाग्दा पनि नागरिक उन्मुक्ति पार्टी तटस्थ बसेको छ । नागरिक उन्मुक्ति पार्टीले ठोस निर्णय दिन नसक्दा अहिलेसम्म सुदूरपश्चिममा कस्को सरकार बन्छ भन्ने टुङ्गो लाग्न सकेको छैन् ।
माओवादी र नागरिक उन्मुक्ति पार्टीको समर्थन लिएर एमाले संसदीय दलका नेता राजेन्द्र रावलले मुख्यमन्त्रीमा दाबी पेश गर्ने तयारी गरेका छन्। रावलले आज ४ बजे सम्म मुख्यमन्त्रीको दाबी पेश गर्ने बताएका छन् ।
मुख्यमन्त्रीमा रावललाई समर्थन गर्ने वा नगर्ने विषयमा नागरिक उन्मुक्ति पार्टीका प्रदेशसभा सदस्यहरू मौन रहेका छन् । नागरिक उन्मुक्ति पार्टीका संसदीय दलका नेता रामेश्वर चौधरीले केन्द्रीय नेतृत्वको निर्देशनको पर्खाइमा रहेको बताए ।
उता, नागरिक उन्मुक्तिका महासचिव रतन थापासहितका नेताहरू भने रेशम चौधरीसँग छलफल गर्न डिल्लीबजार कारागार पुगेका छन् ।
एमाले संसदीय दलका नेता रावलसहित प्रदेशसभा सदस्यहरू पनि नागरिक उन्मुक्ति पार्टीको निर्णयको प्रतिक्षामा बसेका छन् ।
प्रदेश सरकार गठन र सभामुखको मनोनयनलगायतका विषयमा छलफल गर्न बिहान ८ बजे बोलाइएको संसदीय दलको बैठक अहिलेसम्म बस्न सकेको छैन।
भावी रणनीति बनाउन कांग्रेस संसदीय दलका नेता कमलबहादुर शाह र नेकपा (एकीकृत समाजवादी) को संसदीय दलका नेता दीर्घ सोडारी छलफलमा जुटेका छन् । उनीहरूले उन्मुक्ति पार्टीलाई एमाले र माओवादीबाट अलग गरेर प्रदेश सरकार गठन गर्न प्रयास जारी राखेका छन्।
नागरीक उन्मुक्ति पार्टीको प्रतिक्षमा रहेको एकीकृत समाजवादी ससदीय दलका नेता दिर्घ बहादुर सोडारीले बताए ।
सुदूरपश्चिममा मुख्यमन्त्रीको दाबी पेश गर्ने समय आज साँझ ५ बजेसम्म छ ।
