काठमाडौं- नेकपा एमाले निकट विद्यार्थी संगठन अनेरास्ववियुको २३औं राष्ट्रिय महाधिवेशन नजिकिएसँगै चुनावी सरगर्मी बढेको छ । अनेरास्ववियुको नेतृत्वका लागि दावेदारहरुले गतिविधि अघि बढाएका छन् ।
आगामी २–४ फागुनमा तोकिएको महाधिवेशनबाट संगठनको अध्यक्ष बन्नेगरी वरिष्ठ उपाध्यक्ष आरसी लामिछाने, उपाध्यक्ष मोती विक, अर्का उपाध्यक्ष लोकेश निरौला र महासचिव समिक बडालले तयारी गरिरहेका छन् ।
दाबेदार चारै जनाले सर्वसहमत र मतदान हुँदा समेत जित्ने दाबी गरिरहेका छन् । लामिछाने संगठनको वरिष्ठ उपाध्यक्ष, मोती र लोकेश उपाध्यक्ष हुन् भने बडाल महासचिव हुन् । उनीहरु पक्षधरहरुले चुनावी लबिङ नै सुरु गरिसकेका छन् । उनीहरुले आफूले समर्थन गरेकै नेताले जित्ने आधार तयार पारिरहेका छन् ।
यसपटक अखिलले पदाधिकारी संख्या घटाएकाले पनि आकांक्षी व्यवस्थापनमा समस्या देखिएको छ । गएको १–२ असोजमा सम्पन्न विधान महाधिवेशनले पदाधिकारी संख्या ३२ बाट १७ मा झार्ने निर्णय गरेको छ । त्यो निर्णयअनुसार, एक अध्यक्ष, चार उपाध्यक्ष, एक महासचिव, दुई उपमहासचिव, नौ सचिव र एक कोषाध्यक्ष चयन हुनेछ ।
केन्द्रीय कमिटी सदस्य पनि ५३३ बाट १९९ मा झार्ने निर्णय अखिलले गरेको छ । पदाधिकारी र केन्द्रीय सदस्य संख्या घटाउने निर्णयले पनि यो महाधिवेशनमा आकांक्षीहरुको व्यवस्थापन सजिलो देखिँदैन ।
अखिलको २२औं महाधिवेशन २०७२ को फागुनमा भएको थियो । त्यो महाधिवेशनले अध्यक्षमा नविना लामा र महासचिव ऐन महर निर्वाचित गरेको थियो । लामा २०७४ कै प्रतिनिधिसभा सदस्य चुनावबाट सांसद भइन् । उनलाई एमालेले समानुपातिक कोटाबाट सांसद बनाएको थियो ।
तर २०७५ वैशाखमा नेकपा एमाले र माओवादी केन्द्रबीच एकता भयो । पार्टी एकतापछि अखिलको संयोजक ऐन महर र सहसंयोजक माओवादी केन्द्र निकट अखिल क्रान्तिकारीका रञ्जित तामाङ भए ।
नेकपाको एकता प्रक्रिया भंग भएर पुनस्र्थापित एमालेको अखिलमा महर अध्यक्ष भए । २०७८ असोजमा अखिलले महरलाई नेतृत्वबाट बिदा गरेर सुनिता बराललाई ल्यायो । २२औं महाधिवेशनबाट बरालले उपाध्यक्ष जितेकी थिइन् ।
बराललाई पनि गत मंसिरको चुनावबाट एमालेले प्रतिनिधिसभा सदस्य चयन गरेको छ । बराल एमालेको केन्द्रीय सदस्य समेत बनेपछि अखिलले २३औं महाधिवेशनको तयारी गरिररहेको हो ।
