धनगढी – कैलाली ट्राफिक प्रहरीले जरिवानासँगै ट्राफिक कक्षा पनि अनिवार्य गर्न थालेको छ। मादक पदार्थ सेवन गरी सवारी चलाउने र लेन अनुशासन उल्लङ्घन गर्ने चालकलाई सोमबारदेखि जिल्ला ट्राफिक प्रहरी कार्यालय कैलालीले नियम पालनामा कडाइ गरेको हो।
दुर्घटना न्यूनीकरण गराउने उद्देश्यले यसरी दुई वटा कसुरमा एक घण्टा चेतनात्मक कक्षा सुरु गरिएको हो। यस्तो प्रावधान यसअघि ट्राफिक प्रहरीले उपत्यकामा लागू गरेको थियो। कैलालीमा पहिलो पटक अनुशासन पालनासम्बन्धी सचेतनामूलक कक्षा सञ्चालन हुन थालेको हो।
‘चालक र पैदल यात्रुकै सुरक्षाका लागि हामीले सचेतनामूलक ट्राफिक कक्षा सुरु गरेका हौँ,’ ट्राफिक प्रहरी कार्यालय कैलालीका प्रमुख, इन्स्पेक्टर वीरेन्द्र जोहारीले भने, ‘यसले ट्राफिक नियम पालनामा प्रोत्साहन मिल्ने हाम्रो अपेक्षा छ।’
जिल्लामा मादक पदार्थ सेवन गरी चलाउने र लेन अनुशासन उल्लङ्घन गर्ने प्रवृत्ति देखिएपछि ट्राफिक प्रहरीले कडाइ गर्न थालेको हो।
