धनगढी- कैलालीमा एक मतदान केन्द्र स्थानान्तरण र एक मतदान स्थल स्थानान्तरण सिफारिस गर्ने निर्णय गरिएको छ । प्रदेश निर्वाचन कार्यालय कैलालीले धनगढीको एक मतदान केन्द्र स्थानान्तरण र टीकापुरको एक मतदान स्थल स्थानान्तरण गर्न निर्वाचन आयोगमा सिफारिस गर्ने निर्णय गरेको हो ।
निर्वाचन कार्यालयले टीकापुर नगरपालिका वडा नम्बर १ स्थित खड्क स्मृति माध्यमिक विद्यालयमा रहेको मतदान केन्द्रलाई कायम राख्दै सोही वडाको कर्णाली माध्यमिक विद्यालयमा थप मतदान स्थल कायम गरिदिन निर्वाचन आयोगमा सिफारिस गर्ने निर्णय गरेको प्रदेश निर्वाचन कार्यालय कैलालीका प्रमुख प्रेमराज भट्टले बताए । हाल टिकापुर–१ म तीनवटा मतदान स्थल छन् ।
यसैगरि धनगढी उपमहानगरपालिका वडा नम्बर ३ स्थित जनता आधारभूत विद्यालय विशालनगर मतदान केन्द्रमा रहेको मतदाताको चाप र असहजतालाई मध्येनजर गर्दै वडा नम्बर ३ को वडा कार्यालयमा मतदान केन्द्र स्थानान्तरणका लागि आयोगलाई सिफारिस गरेको प्रदेश निर्वाचन कार्यालय भट्टले जानकारी दिए ।
यस्तै निर्वाचन कार्यालयले जिल्ला भरिका १० वटा विद्यालयमा छिटै मतदाता शिक्षा सञ्चालन गर्न तयारीमा रहेको छ । अनलाइन मतदाता नामावली दर्ता समेत सुरु भइसकेको प्रमुख भट्टले बताए । हाल जिल्लामा मतदान केन्द्र २३७ वटा रहेका छन् भने मतदान स्थल ६२९ वटा रहेका छन् ।
