धनगढी- सुदूरपश्चिमका उद्योगी व्यवसायीहरुले बैंकको चर्को व्याजदरविरुद्ध जारी आन्दोलनलाई थप शसक्त बनाउने तयारी गरेका छन् । सोही तयारी स्वरुप कैलाली उद्योग वाणिज्य संघले शनिबार आगामी आन्दोलनका कार्यक्रमका विषयमा वस्तुगत संघ–संस्थाहरुसँग छलफल गरेको छ ।
आन्दोलनमा नेपाल उद्योग वाणिज्य संघले साथ नदिएपछि आक्रोशित भएका यहाँका उद्योगी व्यवसायीहरु लुम्बिनी र कर्णाली प्रदेशका उद्योग वाणिज्य संघहरुसंग मिलेर आन्दोलनलाई अगाडि बढाउने तयारीमा छन् ।
‘हाम्रो आदोलनमा नेपाल उद्योग वाणिज्य महासंघ साथ दिने पक्षमा देखिएन,’ कैलाली उद्योग वाणिज्य संघका अध्यक्ष पुष्पराज कुँवरले भने, ‘अब महासंघलाई बाइपास गरेर लुम्बिनी र कर्णाली प्रदेशका उद्योग वाणिज्यसंग मिलेर आन्दोलनलाई थप सशक्त बनाउने तयारीमा छौं ।’ उनले आफूहरुको आन्दोलनमा लुम्बिनी र कर्णालीका उद्योग वाणिज्य संघहरु ऐक्यवद्धता जनाउन तयार छन् ।
उनका अनुसार अब तीनवटै प्रदेशका उद्योग वाणिज्य संघहरु महासंघलाई बाइपास गरेर आन्दोलनलाई अगाडि बढाउने विषयमा छलफलमा केन्द्रीत छन् । महासंघले अझै पनि आफूहरुको आन्दोलनमा साथ नगरे महासंघको कार्यालय नै घेराउ गरिने अध्यक्ष कुँवरले बताए ।
आन्दोलनका आगामी कार्यक्रम अन्तर्गत केही दिनभित्रै राष्ट्र बैंकमा धर्ना दिनेलगायतका कार्यक्रम रहेको उनले बताए । सुदूरपश्चिमबाट प्रतिनिधित्व गर्ने संघीय सांसद र प्रदेशका सांसदहरुसँग पनि यस विषयमा छिटै छलफल गरिने अध्यक्ष कुँवरको भनाइ छ ।
