धनगढी । सुदूरपश्चिम प्रदेशका विभिन्न जिल्लामा प्रहरीले अवैध लागूऔषध तथा भरुवा बन्दुक बरामद गर्नुका साथै फरार प्रतिवादीसहित पाँच जनालाई पक्राउ गरेको छ।
कैलालीको जानकी गाउँपालिका–७ उच्चा गोलौरीबाट खैरो हेरोइनजस्तो देखिने धुलो पदार्थ २ ग्राम ८३० मिलिग्रामसहित २९ वर्षीय वीरबहादुर चौधरी र १८ वर्षीय किशोर पक्राउ परेका छन्। इलाका प्रहरी कार्यालय टीकापुरबाट खटिएको टोलीले शुक्रबार दिउँसो शंका लागेर जाँच गर्ने क्रममा उक्त पदार्थ फेला पारेको हो।
त्यस्तै, बझाङको बित्थडचिर गाउँपालिका–८ रुपैलबाट १ किलो ९९ ग्राम चरेशजस्तो देखिने कालो पदार्थसहित दुई जना पक्राउ परेका छन्। तलकोट गाउँपालिका–१ का ३२ वर्षीय नरेन्द्रकुमार ऐडीले चलाएको जीपमा सवार जयपृथ्वी नगरपालिका–११ दयकुम्लाका ६१ वर्षीय सिंग धामीको झोलाबाट उक्त पदार्थ बरामद भएको प्रहरीले जनाएको छ। प्रहरीले पदार्थसहित जीप र दुवै जनालाई नियन्त्रणमा लिएको छ।
यसैबीच, डोटीको सायल गाउँपालिका–५ बुङ्गा ओखलधार, अछामको मेल्लेख गाउँपालिका–६ बिलेद खोला र बाजुराको गौमुल गाउँपालिका–१ सुपाकुनाबाट प्रहरीले एक–एक थान भरुवा बन्दुक बरामद गरेको छ। तीनवटै घटनामा बन्दुक जंगल तथा ओढारमा लुकाइराखेको अवस्थामा फेला परेको प्रहरीले जनाएको छ।
यस्तै, फैसला कार्यान्वयनका क्रममा कैलालीबाट लागूऔषध मुद्दामा १ वर्ष कैद र ५ हजार रुपैयाँ जरिवाना तोकिएका घोडाघोडी नगरपालिका–१० का ४० वर्षीय नरबहादुर घिमिरे पक्राउ परेका छन्।
कञ्चनपुर प्रहरीले पनि विभिन्न मुद्दामा फरार रहेका दुई जनालाई पक्राउ गरेको छ। बहुविवाह मुद्दामा १ वर्ष १० महिना २८ दिन कैद र २० हजार रुपैयाँ जरिवाना तोकिएका कृष्णपुर नगरपालिका–१ का २५ वर्षीय बलबहादुर वली तथा लागूऔषध मुद्दामा ४ वर्ष कैद र ५ हजार रुपैयाँ जरिवाना तोकिएका भीमदत्त नगरपालिका–१८ का २७ वर्षीय प्रतिक कुँवर पक्राउ परेका हुन्।
प्रहरीका अनुसार पक्राउ परेका तथा बरामद सामग्रीका सम्बन्धमा आवश्यक अनुसन्धान भइरहेको छ।