धनगढी- सुदूरपश्चिम प्रदेशका मुख्यमन्त्री कमलबहादुर शाहले प्रदेश सरकारले सञ्चार नीति र विज्ञापन नीतिलाई प्राथमिकतामा राखेर सरकारले काम गर्ने प्रतिबद्धता जनाएका छन् । नेपाल पत्रकार महासंघ सुदूरपश्चिम प्रदेशको तेस्रो साधारणसभा उद्घाटन गर्दै मुख्यमन्त्री शाहले पत्रकारिता क्षेत्र विकासका लागि पत्रकार महासंघको परामर्श र सहयोगमा हर सम्भव प्रयास गरिने समेत बताए ।
मुख्यमन्त्री शाहले भने, ‘पत्रकार महासंघले सञ्चार नीति र विज्ञापन नीतिका विषयमा कस्तो प्रारुप बनाएको छ त्यही अनुरुप सरकारले छलफल गरेर अगाडि बढाउने छ ।’ विज्ञापन नीति नभएका कारण पत्रकारिता क्षेत्रको विकासमा देखिएको विभेदको अन्त्य गरिने पनि मुख्यमन्त्री शाहले प्रतिबद्धता जनाए । शाहले भने, ‘अघिल्ला सरकारले गरेका प्रयासलाई अझ बढी प्रभावकारी र सशक्त बनाउँदै पत्रकार महासंघको सहयोगमा दूरगामी असर पर्ने गरी सरकारले यस क्षेत्रको विकासका लागि काम गर्ने छ ।’
प्रदेश सरकारका भौतिक पूर्वाधारमन्त्री प्रकाश देउवाले पनि सञ्चार क्षेत्रको विकास गर्न सरकार प्रतिबद्ध रहेको बताएका छन् । लोकतन्त्रको आधार स्तम्भ स्वतन्त्र प्रेस भएको प्रति सरकार उत्तरदायी रहेको पनि देउवाले बताए । मन्त्री देउवाले भने, ‘सरकारलाई उत्तरदायी बनाउँदै सुशासन कायम गर्नमा पत्रकारहरुको महत्वपूर्ण भूमिकाप्रति सरकार आशावादी रहेको छ ।’
पत्रकार महासंघका केन्द्रीय महासचिव रोशन पुरीले पत्रकारिता क्षेत्रलाई खल्बल्याउने गरी भइरहेका घटनाप्रति सबै सञ्चारकर्मीले सचेत हुनुपर्ने बताएका छन् । कैलालीको गोदावरीस्थित पर्यटकीय गन्तव्यशालीनी वाटिकामा सुरु भएको पत्रकार महासंघको प्रदेश साधारणसभा दुई दिनसम्म चल्ने प्रदेश अध्यक्ष योगेश रावलले बताए । रावलले वर्तमान सरकारबाट सञ्चार क्षेत्रको विकासका लागि महत्वपूर्ण हुनेमा पत्रकारहरु आशावादी रहेको बताए ।
