कैलाली- स्वतन्त्र विद्यार्थी युनियनको निर्वाचनमा सुदूरपश्चिम प्रदेशका अधिकांश क्याम्पसमा एमालेनिकट अनेरास्ववियुका उम्मेदवार निर्वाचित भएका छन् । आज बिहानसम्म २२ क्याम्पसको मत परिणाम सार्वजनिक हुँदा बैतडी, बझाङ, दार्चुला र कैलालीका अधिकांश क्याम्पसुमा अनेरास्ववियुका उम्मेदवार निर्वाचित भएका हुन् ।

बैतडीको नवप्रभात बहुमुखी क्याम्पसमा अनेरास्ववियुकी रेखा घटाल, श्रीकोट बहुमुखी क्याम्पसमा शम्भुराज गिरी र सेटीगाउँ बहुमुखी क्याम्पसमा मोहन बोहरा निर्वाचित भएका छन् । बझाङको थलारा बहुमुखी क्याम्पसमा महेश जेठारा, सेती क्याम्पसमा लक्ष्मण गिरी र सुनकुडा क्याम्पसमा दिलीप अधिकारी निर्वाचित भएका छन् भने दार्चुलाको कृष्ण स्नातक क्याम्पसमा हेमन्ती जोशी निर्वाचित भएका छन् । उनीहरू सबै अनेरास्वियुका हुन् ।

यस्तै कैलालीको नौवटा मध्ये पाँचवटा क्याम्पसकाे प्राप्त नतिजा अनुसार अनेरास्ववियुका उम्मेदवार निर्वाचित भएका छन् । कैलालीको बुलबुले बहुमुखी क्याम्पसमा पुष्पा खाती, खप्तड बहुमुखी क्याम्पसमा पुष्कर अवस्थी, चौमाला बहुमुखी क्याम्पसमा हरेन्द्र बुढा, लम्की बहुमुखी क्याम्पसमा कल्पना तिमिल्सना, ऐश्वर्य बहुमुखी क्याम्पसमा कुबेर खड्का निर्वाचित भएका हुन् ।

कञ्चनपुरको रौलेश्वर जनता आर्दश बहुमुखी क्याम्पसमा दीलेन्द्रप्रसाद बडू र कञ्चन बहुमुखी क्याम्पसमा देवबहादुर साउँद निर्वाचित भएका छन् भने डोटीको खप्तड आदर्श क्याम्पसमा श्याम विक निर्वाचित भएका छन् । यी तीनै जना पनि अनेरास्ववियुका हुन् ।

डडेल्धुरा बहुमुखी क्याम्पसमा नेपाल विद्यार्थी सङ्घका उम्मेदवार दुर्गाप्रसाद भट्ट निर्वाचित भएका छन् । यस्तै कञ्चनपुरको कृष्ण बैजनाथ बहुमुखी क्याम्पसमा नेविसंघकै कृष्णराज जोशी र महाकाली बहुमुखी क्याम्पसमा नेविसंघका निरज भण्डारी निर्वाचित भए ।