बैतडी- बैतडीमा माध्यमिक शिक्षा परीक्षा (एसईई)मा ५ हजार बढी विद्यार्थी सहभागी हुने भएका छन् । यही चैत १७ गतेबाट हुने परीक्षामा ५ हजार ३५१ विद्यार्थी सहभागी हुनलागेको शिक्षा विकास तथा समन्वय इकाइले जनाएको छ । जसमा २ हजार ६६२ छात्र र २ हजार ६८९ छात्रा छन् ।
४ हजार ९८९ नियमित, ग्रेड वृद्धि १४४ र प्राविधिक धारका २१८ जना गरि ५ हजार ३५१ जना परीक्षामा सहभागी हुने शिक्षा विकास तथा समन्वय इकाई प्रमुख नरेन्द्रप्रसाद अवस्थीले बताए । उनले जिल्लामा परीक्षाको तयारी अन्तिम चरणमा पुगेको बताए ।
परीक्षा केन्द्र यस अघिनै निर्धाण भइसकेको र केन्द्राध्यक्ष नियुक्त गरेर अभिमुखिकरण तालिम दिइने उनले बताए । उनका अनुसार परीक्षाका लागि २५ केन्द्र तोकिएका छन् । जिल्ला परीक्षा समन्वय समितिको बैठकले एसइइ परीक्षा सञ्चालनका लागि २५ ओटा केन्द्र तोकेको थियो ।
विगतमा ग्रेड वृद्धि र प्राविधिक धारका परीक्षार्थीका लागि अलगै केन्द्र तोकिने गरेको थियो । अन्य वर्ष ग्रेड वृद्धि र प्राविधि धारका लागि अलग केन्द्र राखिने गरेको भएपनि यो वर्ष त्यो केन्द्र हटाइएको छ ।
