बैतडी- बैतडीमा पशु चौपायामा लम्पी स्कीन रोगको संक्रमण देखिएको छ । सुरुमा पशु चौपायामा फाटफुट रुपमा देखिएको यो रोग अहिले प्रकोपकै रुपमा फैलिएको हो ।
भेटेरेनरी अस्पताल तथा पशुसेवा विज्ञ केन्द्र पाटनका प्रमुख गुमानी पन्तले सुरुमा पाटनका किसानले पालेका पशुचौपायामा लम्पी स्कीन भएको प्रमाणित भएको बताए ।
उनले यो रोग हाल जिल्लाको शिवनाथ र सुर्नया गाउँपालिका तथा मेलौली नगरपालिकामा यो प्रकोप देखिएको बताए । ‘जिल्लाका सबै स्थानीय तहका यो रोगको संक्रमण देखा परेको छ,’ उनले भने, ‘पाटन, मेलौली, शिवनाथ, सुर्नयामा भने प्रकोपकै रुपमा देखा परेको छ ।’ उनका अनुसार अहिले दैनिक १५ देखि २० पशुमा रोग देखा परेको खबर आउने गरेको छ ।
गाई, गोरुमा यो रोग देखा परेको छ । संक्रमण बढेपनि हालसम्म पशु भने मरेको तथ्यांक नआएको केन्द्रले जनाएको छ । शिवनाथ गाउँपालिकाका पशु शाखा प्रमुख प्रकाशसिंह साउँदका अनुसार यो रोग नियन्त्रण बाहिर गइसकेकाले प्राथमिक उपचार सुरु गरिएको बताए ।
यो रोग निको पार्ने सम्बन्धी कुनै भ्याक्सिन नभएको उनले बताए । ‘यो रोगबाट ग्रसित रहेका पशुहरुका लागि ठोस उपचार छैन, सामान्य एन्टिबायोटिक दिने काम सुरु गरेका छौं’ उनले भने ।
पशु चौपायामा लम्पी स्कीन रोग देखा परेपछि किसानहरु चिन्तित भएका छन् । यो रोग झिङ्गा, मच्छर र किर्नाले टोकेमा वा दानापानी, चरन क्षेत्र र पशुको आपसमा सङ्सर्गका माध्यमबाट फैलिने भएकाले सचेत रहन सबैमा अपिल गरिएको छ ।
यो रोग लाग्दा पशुका खुट्टाका जोर्नी फुल्ने, ज्वरो आउँने, शरीरको छालामा फोका उठ्ने, ¥याल र सिंगान काँड्ने, गर्भीर्णी पशु तुहिने, बाँझोपनको समस्या र दुहुनो गाईले दूध कम दिने समस्या देखा पर्ने गर्दछ ।
रोग नियन्त्रण गर्न किसानले भुसुना, किरा र लामखुट्टे नियन्त्रणका लागि गोठको सरसफाई, भकारो (पर्सो) व्यवस्थापन र चरन क्षेत्रको ख्याल गर्नु पर्ने हुन्छ ।
