काठमाडौं- अर्थशास्त्री डा. स्वर्णिम वाग्लेले नेपाली कांग्रेस छाडेका छन् । वाग्लेले राष्ट्रिय स्वतन्त्र पार्टी (रास्वपा)ले तनहुँ–१ बाट उपनिर्वाचनमा उम्मेदवार बन्न प्रस्ताव गरेपछि कांग्रेस छाडेको बताएका छन् ।
सभापति शेरबहादुर देउवा र देउवापत्नी एवं केन्द्रीय सदस्य आरजू राणा देउवाका कारण आफूले कांग्रेस छाड्नुपरेको उनले बताएका छन् । वाग्लेले यसअघि मंसिर ४ को निर्वाचनमा उम्मेदवार बन्ने चाहाना राखेका थिए । तर उनले टिकट पाउन सकेनन् ।
उनले कांग्रेस नेता डा. शेखर कोइराला तथा महामन्त्रीद्वय गगनकुमार थापा र विश्वप्रकाश शर्मालाई एउटै सन्देश पठाएर कांग्रेस छाडेको जानकारी दिएका हुन् । सो सन्देश उनले अन्य डा. गोविन्दराज पोखरेललाई पनि पठाएका छन् ।
उनले सन्देशमा लेखेका छन्, ‘हजुरहरुको अपार सद्भावका बाबजुद म कांग्रेसमा रहन नसक्ने अवस्था आएको छ । ‘देउवा–आरजु गिरोहको निरन्तर हेपाइ र अपमानले यो स्थिति ल्याएको हो ।’
यस्तो छ सन्देश
प्रिय दाइ,
हजुरहरुको अपार सद्भावका बावजुद म कांग्रेसमा रहन नसक्ने अवस्था आएको छ । देउवा–आरजु गिरोहको निरन्तर हेपाइ र अपमानले यो स्थिति ल्याएको हो ।
अब कुरेर बस्ने कृपा र निगाहको जीवनपर्यन्त राजनीतिभन्दा समयसीमा तोकेर आफ्नो उमेर, ज्ञान र ऊर्जा सान्दर्भिक रहँदै ’डेलिभरी’को प्रयोगमा जान चाहेँ ।
यो निर्णय लिनुअघि हजुरहरुसँग भेटेको भए निश्चय पनि कांग्रेस नछोड्न भन्नुहुने र त्यसपछि छोड्दा अवज्ञा गरेको हुने भएकोले श्रद्धापूर्वक पछि नै हामी बस्नेछौंँ ।
कांग्रेस पार्टीमा हजुरहरुको निर्णायक हैसियत बनेको दिन फेरि हामी कुनै न कुनै रुपमा जोडिनसक्ने आशा छ । त्यतिन्जेल जहाँजहाँ रहन्छौँ, त्यहीँबाट सहकार्य र सहयोग गर्ने र अहिलेको आत्मीय मित्रता कायम राख्ने वाचा गर्दछु ।
