डडेल्धुरा– सुदुरपश्चिम प्रदेशका भौतिक पुर्वाधार विकास मन्त्री प्रकाश देउवाले प्रदेश सरकारबाट कार्यान्वयन भईरहेका बिभिन्न योजनाहरुको अनुगमन गरेका छन । ३ दिन लगाएर प्रदेशका ३ जिल्लाका दुई दर्जन भन्दा बढी योजनाको अनुगमन तथा स्थानीयसंग अन्तरक्रिया गरेका हुन्।

योजना अनुगमनका क्रममा मन्त्री देउवाले अब हचुवाका भरमा म्याद थपेर निर्माण कार्य अलपत्र हुन नदिने र काम नगर्ने निर्माण कम्पनीलाई कार्वाही गरिने बताएका थिए।

मन्त्री देउवाले मन्त्रालयका सचिव प्रेमदत्त भट्ट सहित प्राबिधिकको टोली लिएर कञ्चनपुरदेखि डडेल्धुरा र डोटीमा निर्माण भईरहेका तथा प्रदेश सरकारको रातो किताबमा उल्लेख भएका योजनाहरुको स्थलगत अनुगमन गरे।

शुक्रबारदेखि आइतबार बेलुकासम्म उनले तीन जिल्लाका सडक, सिचाइँ, खानेपानी, तटबन्धन, पुललगायतका दुई दर्जन भन्दा बढी योजनाको अनुगमन गरेका छन्।

प्रदेशले सञ्चालन गरिरहेका योजनाको अवस्था के छ, ती योजनाको प्रगतिका लागि के गर्नुपर्छ र आगामी बजेटमा कस्ता योजना समावेश गर्नुपर्छ भन्ने उद्देश्यले अनुगमन गरिएको भौतिक पूर्वाधार विकास मन्त्री प्रकाश देउवाले बताए।

उनले खासगरी लामो समयदेखि ठेक्का लागेर पनि प्रगती हुन नसकेका योजनाहरुलाई कसरी अघि बढाउने भन्ने बारेमा स्थलगत अनुगमन गरिएको र चाँडै निर्णयमा पुग्ने बताए ।

मन्त्री देउवाले हरेक योजना अनुगमनका क्रममा सम्झौता अवधिभित्र योजना सम्पन्न गर्न निर्माण कम्पनी र रेखदेख गर्ने सम्बन्धित कार्यालयलाई निर्देशन दिए। अनुगमनपछि स्थानीयमा विकासको आस पलाएको छ।

डडेल्धुराको पर्शुराम नगरपालिकाका स्थानीय चन्द्र वोहोराले भने, ‘यसअघि कसले योजना ल्याउँथे कहाँ बनाउथे केही थाहा हुदैनथ्यो, टाठाबाठाहरुले हामीले ल्याएका योजना भन्दै अलि अलि काम गरेर खान्थे, अब मन्त्री आफै आएर स्थानीयको आवश्यकताका योजना मात्रै दिने भनेपछि काम हुन्छ कि भन्ने आशा पलाएको छ ।

उनले गाउँका आवश्यकता भन्दा पनि कमिसन दिएर कमाउने योजना भएका कारण प्रदेश सरकारले गरेका काम नदेखिएको बताए।’ यस्तै आलिताल गाउँपालिकाका गंगा धामीलाई पनि प्रदेश सरकार प्रति केही आशा पलाएको छ।

उनले भने, ‘यस अघि प्रदेस सरकारबाट आउने अधिकांस योजनामा बिचौलियाहरुले कमिशन दिएर खाएर ल्याउने गरेका थिए, यसपटक त्यसको मात्र अन्त्य भएपनि धेरै विकास हुनेछ।’ अनुगमनका क्रममा गरिएका अन्तरकृया कार्यक्रममा मन्त्री देउवाले अब हरेक योजनाको माग स्थानीय तहबाटै गर्न अनुरोध गरे।

उनले भने, ‘तपाईँहरुको आवश्यकता के हो, कुन योजना प्राथमिकतामा हो, स्थानीय तहबाट सिफारिस गरेर ल्याउनुहोस्, प्रदेश सरकार प्राथमिकताका आधारमा बजेट बिनियोजन गर्न तयार छ तर ब्यक्तिगतरुपमा योजना माग गर्न मन्त्रालय नआउनुहोला।’

स्थानीयतहले पनि काम गर्न ठाउँ त्यही हो प्रदेश सरकारले पनि त्यही हो, त्यसैले विकासमा एकरुपता कायम गर्न र साँच्चिकै जनताका आवश्यकताका योजना निर्माणका लागि स्थानीय तह मार्फत नै प्रदेशमा योजना पठाउन मन्त्री देउवाले आग्रह गरे ।

डडेल्धुराको गन्यापधुरा गाउँपालिकाका अध्यक्ष ईन्द्रबहादुर कार्कीले भौतिक पुर्वाधार मन्त्री देउवाले प्राथमिकताका आधारमा योजना छनोट गरि पठाउन भनेको त्यही अनुसार अघि बढने बताए।

उनले स्थानीय तह संग समन्वय गरि अघि बढ्दा प्रदेस सरकार पनि सफल हुने र भौतिक मन्त्रीले तयसको पहल गरेकोमा धन्यवाद दिए ।

भौतिक पुर्वाधार विकास मन्त्रालयका सचिब प्रेमदत्त भट्टले मन्त्रीको योजना अनुसार बिभिन्न जिल्लामा संचालित योजनाको अनुगमन र आगामी आर्थिक बर्षका लागि योजना छनोटको अध्ययन गरिएको बताए।