धनगढी- सुदूरपश्चिम प्रदेशका मुख्यमन्त्री कमलबहादुर शाहले अबको केही भित्रै प्रदेश सरकारले पूर्णता पाउने बताएका छन् ।
शुक्रवार कैलालीको बर्दगोरिया गाउँपालिका–४ मा आयोजित स्वागत तथा सम्मान कार्यक्रममा बोल्दै सो कुरा बताएका हुन् ।
मुख्यमन्त्री शाहले केन्द्रीय सरकारको भागबन्डाका कारण सुदूरपश्चिम सरकार गठनमा ढिलाइ भएको बताउँदै अब चाडै सरकारले पूर्णता पाउने समेत बताए ।
तीन महिना अघि मुख्यमन्त्रीको शपथ लिएका कमल बहादुर शाह नेतृत्व विस्तार भएको दुई सदस्य मन्त्रीमण्डलमा भौतिक पूर्वाधार विकास मन्त्रालयको जिम्मेवारी सम्हालेका नेपाली काँग्रेसतर्फबाट निर्वाचित प्रकाश देउवा, र आर्थिक मन्त्रालयमा नेकपा एकीकृत समाजवादीका नरेश कुमार शाही रहेका छन् । नेपाली काँग्रेस, नेकपा माओवादी केन्द्र, नेकपा एकीकृत समाजवादी पार्टी र नागरिक उन्मुक्तिको सहयोगमा मुख्यमन्त्री बनेका शाहको नेतृत्वको सरकारमा अहिले दुई दल मात्र रहेका छन् ।
सुदूरपश्चिम प्रदेशको सामाजिक विकास मन्त्रालयको नेतृत्वका लागि दुई दलको दाबी रहेका कारण प्रदेश सरकार गठनमा ढिलाइ भएको छ । मुख्यमन्त्री कमलबहादुर शाह नियुक्त भएको तीन महिनापछि विस्तार हुन लागेको सरकारमा नेकपा माओवादी केन्द्र र नागरिक उन्मुक्ति पार्टी पनि सहभागी हुन लागेका छन् । प्रदेशको सामाजिक विकास मन्त्रालयमा नेकपा माओवादी केन्द्र र उन्मुक्ति दुवै दलको अडान कायम रहेको छ । नेकपा माओवादी केन्द्रले तीन र उन्मुक्तिले दुई मन्त्रालयमा दाबी गरेपछि सामाजिक विकास मन्त्रालयको नेतृत्व कसलाई दिने भन्ने अहिलेसम्म सहमति जुट्न सकेको छैन ।
साथै मुख्यमन्त्री शाहले वडा भेलाले स९साना योजना भन्दा पनि दीर्घकालीन र आवश्यकताका आधारमा योजनाहरू छनौट गर्न सुझाव सँगै आग्रह गरे । आवश्यकताका आधारमा योजनाहरू ल्याउनुहोस् म विकासका क्षेत्रमा काम गर्न तयार छु । मुख्यमन्त्री शाहले भने प्रदेशको बजेटलाई चुनावी क्षेत्र लक्षित गर्दा प्रदेशमा विकास नभएको हो । चुनावी क्षेत्र मात्र नभएर कहाँ आवश्यक छ, त्यहाँ काम गरे अबको ४ वर्षमा प्रदेशको मुहार फेरिने मुख्यमन्त्री कमल बहादुर शाहले बताए ।
उनले देश संघीयतामा गईसकेपनी प्रदेश सरकार प्रतिको विश्वास अझैपनी जनताले अनुभूति गर्न नपाएको भन्दै आफूले त्यसको अनुभूति स्वरूप मेरो प्रदेश मेरो सरकारको आभास हुने गरी काम गरेर देखाउने बताए । मुख्यमन्त्री शाहले शुक्रवार वडा नम्बर ४ स्थित पर्यटकीय क्षेत्र पुरैना ताल र नदिकटान क्षेत्रको अवलोकन समेत गरेका छन् ।
