धनगढी- कञ्चनपुरका महेश नेपालीको कैलालीको चिसापानीमा भएको मृत्यु प्रकरणमा भोलि (बुधबार) चिसापानीमा यातायात बन्द गरिने भएको छ ।
नेपालीको मृत्यु प्रकरणमा अनाहकमा निर्दोष व्यक्तिलाई थुनामा राखिएको भन्दै त्यसको सत्यतथ्य छानविन गर्नुपर्ने माग गर्दै चिसापानी क्षेत्रमा गठित संघर्ष समितिले विज्ञप्ति जारी गर्दै भोलि (बुधबार) चिसापानी क्षेत्रमा यातायात बन्द गर्न लागिएको जानकारी दिएको हो ।
संघर्ष समितिका अनुसार गएको जेठ १६ गते छोरालाई भेट्न दाङ हिँडेका नेपाली चिसापानीमा बसेका र त्यहीक्रममा अस्वभाविक गतिविधि देखाएपछि प्रहरीमार्फत बौनियास्थित साहारा घरमा पठाएको र त्यहाँ उनको मृत्यु भएको थियो ।
साहारा घरमा उनको मृत्यु भएपछि मृतकी श्रीमतीले उनलाई प्रहरीको जिम्मा लगाउने लम्कीचुहा नगरपालिका–३ चिसापानी बस्ने सवारी चालक सन्तोष कडेल र रामबहादुर खडका नेपालीको नाममा उजुरी दिएपछि उनीहरुलाई प्रहरीले पक्राउ गरेको थियो । उनीहरु अहिले कैलाली कारागारमा छन् ।
सघर्ष समितिले विज्ञप्ती जारी गर्दै घटनाको निष्पक्ष छानविन नगरी निर्दोषलाई पक्राउ गरिएको भन्दै यातायात बन्द गर्न निर्णय गरेको हो समितिका संयोजक दिपकदत्त भट्टद्वारा हस्ताक्षरित विज्ञप्तिमा जनाइएको छ ।
संघर्ष समितिले घटनाको छानविनका लागि छानविन समिति गठन गर्नुपर्ने, वास्तविक दोषीको पत्ता लगाई कारबाही गर्नुपर्ने, शवको कागजी रुपमा मात्रै पोष्टमार्टम गरेको भन्दै टीकापुर अस्पतालका चिकित्सकलाई कारबाही गर्नुपर्ने र पीडितलाई क्षतिपूर्ति दिई न्याय दिनुपर्ने माग राखेका छन् ।
