दार्चुला- मार्मा र अपी हिमाल जाने सडक अन्तर्गत बिटुले–पारिबगर सडकखण्डको नलबगरमा ठूलो पहिरो खस्दा यातायात अवरुद्ध भएको छ । मार्मा गाउँपालिका–३ नलबगरमा सोमबार राति पहिरो खस्दा बिटुले–पारिबगर सडक अवरुद्ध भएको हो ।

नलबगरका स्थानीय जनक विष्टका अनुसार सोमबार स्काभेटर लगाएर पहिरो पन्छाए पनि राति फेरि पहिरो खस्दा सडक बन्द भएको हो ।मंगलबार बिहान पनि स्काभेटर लगाएर पहिरो पन्छाउने काम भइरहेको छ । तर ठूलो पहिरो भएकाले र पहिरो खस्ने क्रम जारी रहेकाले पन्छाउन कठिन भएको बताइएको छ ।

पहिरो पन्छाउन नसक्दा पैदल हिँड्न समेत बाटो खुलेको छैन । स्थानीय दिनेशबहादुर सिंहका अनुसार पैदल हिँड्ने बाटो नहुँदा चमेलिया नदी तरेर मार्मा गाउँपालिका–६ शेरी हुँदै लामो बाटो तय गर्नुपर्ने अवस्था छ ।

चमेलिया नदी तर्ने बिटुले–शेरी पुलको सहाराले मार्मा र अपी हिमाल गाउँपालिकाका मानिसहरु पैदल हिँडेर आवतजावत गर्नुपरेको स्थानीय सिंहको भनाइ छ ।