धनगढी- सुदूरपश्चिम प्रदेशका उद्योग,पर्यटन,वन तथा वातावरण मन्त्री रमेशसिंह धामीले संघीयता असफल भए देश असफल हुने बताएका छन् । धनगढीमा शनिबार आयोजित कैलाली उद्योग बाणिज्य संघको ४९ औँ साधारण सभामा बोल्दै मन्त्री धामीले यस्तो बताएका हुन् ।
‘संघीयता हामीले कार्यान्वयन गर्नुपर्छ’ मन्त्री धामीले भने ‘संघीयता फेल हुनु भनेको यो देश फेल हुनु हो,संविधानको मूल मर्म र भावनामा उल्लेख गरिएको छ, संघीयता फेल भयो भने यो संविधान पनि फेल हुन्छ’ ।
संघीयतामाथि विभिन्न प्रश्न गरेर राजनीति दललाई आलोचित गरेर उन्मुक्ति नमिल्ने बताउँदै उनले नीति बनाउने ठाउँमा कस्ता मान्छेहरु पठाएका छौँ,नीति कार्यान्वयन गर्ने प्रशासनिक संरचना कस्तो छ भन्ने पनि बुझ्नु पर्ने बताए ।
सबैले एकताबद्ध भएर अगाडि बढ्नु पर्ने बताउँदै मन्त्री धामीले नयाँ व्यवस्था भएका कारण सबै सिक्ने प्रकृयामा रहेको बताए । त्यस्तै मन्त्री धामीले सुदूरपश्चिम प्रदेशमा उद्योग मैत्री वातावरण बनाउने बताए ।
उनले भने ‘हामीले नीति तथा कार्यक्रममा सुदूरपश्चिममा उद्योग मैत्री वातावरण बनाउने भनेका छौ,सुदूरपश्चिममा लगानी गर्न आउने लगानीकर्तालाई सम्मान गर्छौँ’ । औधोगिक क्षेत्रमा प्रदेश सरकार सहयोगका लागि तयार रहेको उनको भनाइ थियो ।
कैलाली उद्योग वाणिज्य संघका महासचिव ओमबहादुर विष्टले सञ्चालन गरेको कार्यक्रम संघका अध्यक्ष पुष्पराज कुँवरको अध्यक्षतामा सम्पन्न भएको थियो ।
कार्यक्रममा स्वागत मन्तव्य संघका वरिष्ठ उपाध्यक्ष पुष्करराज ओझाले राखेका थिए । साधारण सभामा संघका पदाधिकारी,सदस्य,उद्योगी,व्यवसायी लगायतको उपस्थिति रहेको थियो ।
