धनगढी- धनगढीको मेन रोडमा रुख ढल्दा विद्युत् र सडक अवरुद्ध भएको छ। मुख्यमन्त्री तथा मन्त्रीपरिषद्को कार्यालय अगाडि शनिवार बिहान रुख ढल्दा सडक र विद्युत् अवरुद्ध भएको हो।
धनगढी बिद्युत् वितरण केन्द्रका प्रमुख सूर्य नारायण मण्डलले सडकबाट रुख हटाउने कार्य भइरहेको जानकारी दिए । उनले भने, सडक निमार्णको क्रममा रुख ढलेको थियो, मुख्यमन्त्री तथा मन्त्रिपरिषद् कार्यालय अगाडी हसनपुर फिडरमा छोएको रुख कटाउने कार्य गरिँदै छ, केही बेर लाइन ढिलो सुचारु हुन्छ।
यस्तै रुख ढल्दा उक्त सडक अवरुद्ध भएको छ। सडक अवरुद्ध भएपछि स्थानीयले आवतजावत गर्न धनगढीको हसनपुर-उत्तरबेहडी-चटकपुर सडक प्रयोग गर्नुपरेको थियो ।
मुख्यमन्त्री कार्यालय अगाडि रुख ढल्दा सडक अवरुद्ध भएपछि धनगढी-४ उत्तरबेहडीको सडक प्रयोग गर्दा पैदल यात्रु, अटो रिक्सा,मोटरसाइकल,स्कुल बस एक्कासि जाममा परेका थिए ।
फराकिलो समेत रहेको उक्त सडक प्रयोग गर्दा झन्डै १ किलोमिटर लामो दुरीसम्म सडक जाम हुँदा आवतजावत गर्न यात्रुले निकै हैरानी बेहोर्नुपरेको थियो।
