बाजुरा- बाजुराको पूर्वी उत्तरी भेगको जगन्नाथ गाउँपालिका–३ बेर्मामा आइतबार दिउँसो ट्रक दुर्घटना हुँदा चालकसहित तीन जना घाइते भएका छन् । घाइते हुनेमा दैलेख जिल्ला आठविस गाउँपालिका– ४ का ट्रक चालक ३६ वर्षीय देवराम सिजापति, दैलेख दुल्लु नगरपालिका–२ का सहचालक १७ वर्षीय अर्जनु विक र ट्रकमा सवार भएका जाजरकोटका वीरेन्द्रनगर नगरपालिका–१२ का २२ वर्षीय मोहन घर्तिमगर रहेको जिल्ला प्रहरी कार्यालय बाजुराका प्रहरी निरीक्षक दानसिंह भण्डारीले जानकारी दिएका छन् ।
उनका अनुसार चालक सिजापतिको टाउकोमा चोट र दायाँ खुट्टा भाँचिएको र सह–चालकको टाउको चोट लागेको छ । ट्रकमा सवार रहेका घर्ती मगर भने सामान्य अवस्थामा रहेका छन् । चालक सिजापति सहित तीनै जनालाई उपचारका लागि उद्धार गरेर कोल्टी प्राथमिक स्वास्थ्य केन्द्रमा पठाइएको निरीक्षक सिंहले बताएका छन् ।
कर्णाली प्रदेशको सुर्खेतबाट खाद्यान्न बोकेर हुम्ला जाँदै गरेको कर्णाली प्रदेश ०२–००१६ ख ०५५७ नम्बरको ट्रक कर्णाली करिडोर सडकबाट करिब दुई सय ५० मिटर तल खसेको प्रहरीले जनाएको छ । दुर्घटना कसरी भएको भन्ने बारेमा खुलेको छैन । दुर्घटनाको थप अनुसन्धान भइरहेको प्रहरीले जनाएको छ ।
