धनगढी- सुदूरपश्चिम प्रदेश सरकारका मन्त्रीहरुको स्वकीय सचिव हुँ भन्दै कर्मचारीहरुसँग पैसा उठाउँदै आएका एक जना पक्राउ परेका छन् । कालिकोट शुभकालिका गाउँपालिका–८ मुगराहा समाला घर भई सुर्खेतको वीरेन्द्रनगर नगरपालिका ४ खजुरा बस्दै आएका २९ वर्षीय अम्मरराज सेजुवाललाई कैलाली प्रहरीले पक्राउ गरेको हो ।
जिल्ला प्रहरी कार्यालय कैलालीका प्रहरी नायव उपरीक्षक कूलदीप चन्दका अनुसार सेजुवाललाई नेपालगञ्जको एक होटेलमा लुकेर बसेको अवस्थामा शनिबार पक्राउ गरेर धनगढी ल्याएको हो । आइतबार जिल्ला अदालत कैलालीबाट म्याद थप गरी थप अनुसन्धान अगाडि बढाएको हो ।
सेजुवालले सुदूरपश्चिमका भूमि व्यवस्था, कृषि तथा सहकारी मन्त्रालय, भौतिक पूर्वाधार विकास मन्त्रालय र सामाजिक विकास मन्त्रालयका मन्त्रीको निजी सचिव हुँ भन्दै मातहतका कार्यालयका कर्मचारीसँग पैसा असुली धन्दा मच्चाएका थिए । उनले ९८५११७३३१८ नम्बरबाट फोन गरेर असुली धन्दा मच्चाएका थिए ।
पीडित कैलालीको जानकी गाउँपालिका ५ अमौरास्थित आधारभूत स्वास्थ्य केन्द्र अमौराका अहेब कृष्ण प्रसाद चौधरीलगायत दिएको उजुरीको आधारमा प्रहरी अनुसन्धान बढाएको थियो । कल डिटेल अनुसार सेजुवाल रहेको लोकेसन कैलाली जिल्ला बाहिर देखाएको थियो । जसकारण प्रहरीलाई पक्राउ गर्न चुनौती थपिएको थियो । अन्ततः उनको फोन लोकेसनको आधारमा पक्राउ गरेको प्रहरी नायव उपरीक्षक चन्दले बताए ।
जिल्ला अदालत कैलालीबाट म्यादथपको अनुमति लिई अनुसन्धान जारी रहेकोले सेजुवालले अन्य व्यक्तिहरुलाई समेत ठगी गरेको भए आफूसँग भएको आधार प्रमाणसहित जिल्ला प्रहरी कार्यालय कैलालीमा पीडितहरुलाई जाहेरी दरखास्त पेश गर्न प्रहरीले अपिल समेत गरेको छ ।
सेजुवालले भौतिक पूर्वाधार विकास मन्त्री प्रकाश देउवाका प्रमुख स्वकीय सचिव रमेशकुमार चन्द, भूमि व्यवस्था कृषि तथा सहकारी मन्त्री रामेश्वर चौधरी, राज्यमन्त्री कैलास चौधरीको स्वकीय सचिव विकास ऐर हुँ भनेर डोटी र डडेल्धुरा, कैलालीका विभिन्न व्यक्तिबाट रकम असुलेका थिए ।
उनले ईसेवा आइडीमा पैसा पठाउन लगाउँथे । सेजुवालले २ हजारदेखि ३० हजार रुपैयाँसम्म पठाउनु भनेर व्यक्तिहरूलाई फोन गर्ने गरेको प्रहरीको प्रारम्भिक अनुसन्धानबाट खुलेको छ ।
