बझाङ- बझाङमा आगलागी हुँदा पाँच वटा पसल जलेर नष्ट भएका छन्। ग्याँस पड्केर आगलागी हुँदा बझाङको तल्कोट गाउँपालिका५ खौला बजारमा दुई घरमा रहेका पाँच पसल जलेर नष्ट भएको स्थानीयले बताएका छन्। उत्तम चँदाराको मोबाइल ग्यालरीबाट ग्याँस पड्केर आगलागी हुँदा पाँच पसलमा क्षति पुगेको हो।
तल्कोट गाउँपालिका अध्यक्ष कलक रोकायाका अनुसार दिउँसो करिब २ः३० बाट सुरु भएको आगलागी ३ः४५ मा नियन्त्रणमा ल्याइएको थियो। आगलागीबाट दुई वटा पक्की घरमा व्यवसाय गरिरहेका पाँच व्यवसायीका पसलभित्र रहेका सामान जलेर नष्ट भएको छ।
आगलागीबाट पदम भण्डारीको पसल, एक सुनचाँदी पसल, एक हातेहोजीयारी, मीनबहादुर भोटेको पसल र अञ्जली सिंहको पक्की घरसहित पसलभित्र रहेका सामान जलेको तल्कोट गाउँपालिका अध्यक्ष रोकायाले बताए। आगो नियन्त्रणमा स्थानीय र प्रहरी जुटेका थिए। क्षतिको पूर्ण विवरण आउन बाँकी रहेको प्रहरीले जनाएको छ।
