डोटी- डोटीका स्थानीय सरकारले जाजरकोट र रुकुम पश्चिमका भूकम्पबाट प्रभावितहरुलाई सहयोग गर्ने भएका छन् । नौवटा स्थानीय तहमध्ये चारवटा स्थानीय तहले विज्ञप्ति जारी गर्दै सहयोग गर्ने घोषणा गरेका छन् ।
डोटीको शिखर नगरपालिका,आदर्श गाउँपालिका,बोगटान फुड्सिल गाउँपालिका, सायल गाउँपालिकाले दुई/दुई लाख सहयोग गर्ने भएका हुन् । जाजरकोट र रुकुमपश्चिम जिल्ला विपद् व्यवस्थापन समितिको राहत कोषमा जम्मा हुने गरी एकरएक लाख रुपैयाँ दिने चारवटै पालिकाले विज्ञप्तिमार्फत उल्लेख गरेका छन् ।
त्यसैगरी डोटी उद्योग बाणिज्य संघले पनि भूकम्प प्रभावितलाई सहयोग गर्ने उद्देश्यले राहत संकलन अभियानै सञ्चालन गरेको छ । राहत संकलन अभियानबाट जेजस्तो सहयोग संकलन हुन्छ सो संकलित सहयोग दुवै जिल्लाका भूकम्प प्रभावितलाई हस्तान्तरण गरिने बाणिज्य संघका अध्यक्ष बिक्रम साउँद (घटाल)ले जानकारी दिए ।
शुक्रबार राति जाजरकोटको बारेकोट गाउँपालिका-१ रामीडाडाँ केन्द्रबिन्दु भएर गएको ६दशमलव ४ रेक्टर स्केलको भूकम्पका कारण जाजरकोट र रुकुम पश्चिम क्षेत्रमा ठूलो जनधनको क्षति भएको छ । भूकम्पमा परी जाजरकोट र पश्चिम रुकुममा १५७ जनाको मृत्यु भएको छ भने करिब दुईसय जना घाइते भएका छन्।
