धनगढी- सुदूरपश्चिम प्रदेशमा राष्ट्रिय सभा सदस्य चयनका लागि आज भएको निर्वाचनमा मतदान सकिएको छ। अपराह्न ४ बजेबाट मतगणना हुने प्रदेश निर्वाचन कार्यालयका प्रमुख प्रेम भट्टले जानकारी दिए ।
सुदूरपश्चिम प्रदेशमा २२८ मतदाता रहेकोमा तीन जनाले मतदान नगरेको उनको भनाइ छ। धनगढी उपमहानगरपालिकाका प्रमुख गोपाल हमाल, भजनी नगरपालिकाका उपप्रमुख राजुदेवी तिरुवाले निर्वाचनमा सहभागिता जनाएनन् ।
यसैगरी, मतदाता नामावली सार्वजनिकपछि बाजुराको स्वामीकार्तिक खापर गाउँपालिकाका उपाध्यक्ष मैना जोशीको निधन भएको थियो। हरिराम चौधरी, इन्दु कडरिया र महेशकुमार महराको पदावधि आगामी फागुनमा सकिन लागेकाले रिक्त हुने पद्का लागि निर्वाचन भएको हो।
सुदूरपश्चिममा सत्ता गठन्धनको तर्फबाट नेपाली कांग्रेसबाट नारायणदत्त भट्ट (कैलाली), बलदेव बोहरा (कञ्चनपुर) र नेकपा (माओवादी केन्द्र) का रेणु चन्द (बैतडी) उम्मेदवार हुन् । यसैगरी, नेकपा (एमाले) कैलालीका रामचन्द्र जोशी, सावित्रा घिमिरे र कञ्चनपुरका ईश्वरीप्रसाद खरेल चुनावी मैदानमा उत्रिनु भएको छ।
