धनगढी- कैलालीको धनगढी उपमहानगरपालिकाका नगर प्रमुख गोपाल हमाललाई एक जनाले ज्यान मार्ने धम्की दिएका छन् । नगर प्रमुख हमाललाई आइतबार राती ह्वाट्सएपमा कल गर्दै राना थरका व्यक्तिले ज्यान मार्ने धम्की दिएको प्रहरीले जनाएको छ । ज्यान मार्ने धम्कीपछि नगर प्रमुख हमालले जिल्ला प्रशासनमार्फत सुरक्षा व्यवस्था गर्न निवेदन दिएका छन् ।
जिल्ला प्रशासन कार्यालय कैलालीका सूचना अधिकारी शिवराज जोशीले नगर प्रमुखले निवेदन दिएको बताए । उनले सो निवेदन जिल्ला प्रहरी कार्यालय कैलालीमा पठाइएको बताए ।नगर प्रमुखलाई दिएको धम्कीको विषयमा निवेदन प्रहरीमा आइपुगेको जिल्ला प्रहरी कार्यालय कैलालीका प्रमुख एसपी पदमबहादुर विष्टले बताए ।
‘धम्की दिने व्यक्ति धनगढी वडा नम्बर ६ मटियारीको रहेछ, हामीले उनीसँग फोन सम्पर्क गरेका छौँ’, प्रमुख विष्टले भने, ‘मेयर सापलाई ‘खबरदार मेयर’ भन्ने म्यासेज लेखेको रहेछ ।’
प्रहरीका अनुसार रानाले आफु बौनियाँमा रहेको र मंगलबार प्रहरीमा आउने बताएको प्रहरीले जनाएको छ । प्रहरी प्रमुख विष्टले भने, ‘रानाले लिन आउनु पर्दैन भने पनि हामीले उच्च निगरानीमा राखेर सुरक्षा प्रबन्ध गरेका छौँ ।’
धम्की दिनुको कारण भने खुलेको छैन् ।
प्रहरीले घटनाबारे अनुसन्धान गरिरहेको र म्यासेज पठाउने ब्यक्ति सम्पर्कमा आएपछि विस्तृत कुरा थाहा हुने कैलाली प्रहरी प्रवक्ता डीएसपी कुलदीप चन्दले बताए ।
