धनगढी- कैलालीको गोदावरी नगरपालिकाको अत्तरियास्थित सुप समावेशी आधारभूत विद्यालयमा चौधरी फाउन्डेशनले शैक्षिक सामग्री सहयोग गरेको छ। फाउन्डेशनले बुधबार एक कार्यक्रमका बीच त्यहाँ अध्ययनरत करिब ७० जना अपाङ्गत भएका विद्यार्थीहरुलाई शैक्षिक सामग्री वितरण गरेको हो ।
विद्यार्थीहरुलाई लेखपढ गर्न अत्यावश्यक सामग्री कापी, कलम, वर्णमाला, ज्यामिट्री बक्स प्रदान गरिएको फाउन्डेशनले जनाएको छ। कार्मक्रममा चौधरी ग्रुपका सुदूपश्चिम प्रदेश प्रमुख योगेन्द्र भट्टले चौधरी ग्रुपले लामो समयदेखि विभिन्न रुपमा भुकम्प,बाढीपहिरो पीडितहरुलाई सहयोग गर्दै आएको र आज विद्यालयमा सहयोग गर्न पाउँदा खुसी लागेको बताउदै आगामी दिनमा पनि सहयोग गर्ने प्रतिबद्धता जाहेर गरे। त्यस्तै चौधरी ग्रुप अन्तर्गत सीजी फुड्सका सुदूरपश्चिम प्रदेश प्रमुख नेत्रप्रसाद अर्यालले चौधरी ग्रुपले सामाजिक उत्तरदायित्व अन्तरगत उक्त विद्यालयलाई छनौट गरेको बताए।
कार्यक्रममा विद्यालय व्यवस्थापन समितिका अध्यक्ष विष्ना बोहराले विद्यालयलाई नमुना विद्यालय बनाउने उदेश्य रहेको बताइन । गोदावरी–२ का वडासदस्य डबलसिंह साउदको प्रमुख आतिथ्यतामा सम्पन्न कार्यक्रम विद्यालयका संस्थापक अध्यक्ष मानबहादुर साउदले सञ्चालन गरेका थिए । संचालक साउदले चौधरी ग्रुपलाई धन्यवाद ज्ञापन गर्दै आगामी दिनमा पनि यस्तै किसिमको सहयोग रहने विश्वास रहेको बताए ।
अपाङ्गत भएका बालबालिकाको शैक्षिक आवश्यकतालाई महसुस गरेर प्रदेशमै पहिलोपटक ‘सुप’ समावेशी आधारभूत विद्यालयको स्थापना भएको हो। सो विद्यालयले अपाङ्गता भएका बालबालिकालाई आवाससहित शिक्षाको सुविधा प्रदान गर्न थालेपछि अहिले अपाङ्गत भएका बालबालिकालाई राहत महसुस भएको छ ।
