धनगढी- थारू समुदायमा सदियौँदेखि प्रचलनमा रहेको भलमनसा प्रथालाई जोगाउनुपर्ने सरोकारवालाले जोड दिएका छन् । परम्परागत प्रथा संरक्षण गर्ने उद्देश्यले सुदूरपश्चिम प्रज्ञा–प्रतिष्ठानले भलमनसाका लागि आयोजना गरेको कार्यक्रममा सरोकारवालाले यस्तो धारणा राखेका हुन् ।
सहभागीले भलमनसा प्रथालाई कानुनी मान्यता दिएर प्रदेश सरकार र स्थानीय तहले संरक्षणका कार्यक्रम सञ्चालन गर्नुपर्नेमा जोड दिएका छन् । सुदूरपश्चिम प्रदेश सरकारका बिनाविभागीयमन्त्री अक्कलबहादुर रावलले प्रदेश सरकारले यो प्रथालाई सम्पत्तिका रूपमा लिनुपर्ने बताए । उनले भने, ‘प्रदेश सरकार यो प्रथा संरक्षणका लागि गम्भीर छ । सरकारले बड्घररभलमनसा ऐनको मसौदालाई सबैसंँग सहकार्य गरेर अगाडि बढाउँछ ।’ भलमनसा प्रथासँग सिङ्गो समाजको इतिहास जोडिएको मन्त्री रावलको भनाइ थियो । भलमनसा चयन प्रणाली पनि लोकतान्त्रिक र सुन्दर रहेको उनले उल्लेख गरे। उनले थारू समुदायको पहिचान घर, चुलोदेखि सुरु हुने गरेको भन्दै राम्रो परम्परालाई संरक्षण र नराम्रो परम्परालाई परिमार्जन गर्न जरुरी रहेको बताए।
बड्घररभलमनसा प्रथा संरक्षणका लागि प्रदेश सरकारले ऐन बनाइसकेको छैन । यद्यपि मसौदा समितिले बड्घररभलमनसा ऐनको मसौदा प्रदेश सरकारलाई बुझाइसकेको छ । मसौदालाई छिट्टै ऐनका रूपमा पारित गर्न सदनमा आवाज उठाउने मसौदा समितिका सदस्यसमेत रहेकी प्रदेश सभा सदस्य गीता चौधरीले बताइन् । भलनसाले गाउँ, समाजमा निःशुल्क सेवा दिने काम गरिरहेको उनले उल्लेख गरिन । पछिल्लो समय विभिन्न समुदायको परम्परागत प्रथा, चालचलन लोप भइरहेको छ । थारू समुदायमा रहेको प्रचलित भलमनसा प्रथालाई जोगाउन जरुरी रहेकाले सुदूरपश्चिम प्रज्ञा–प्रतिष्ठानले जोड दिएको छ । गोरखापत्रबाट
